Aǵzadaǵy koronavırýsty jyldam anyqtaıtyn ekspress-testten halyqty ótkizý shamamen 1 sáýirden bastalady. Buryn saraptamanyń nátıjesin alý úshin 6-12 saǵat kútýge týra kelse, bul test aýrýdyń bar-joǵyn sol mezette anyqtaıdy.
Densaýlyq saqtaý mınıstrliginiń Taýarlar men qyzmetter qaýipsizdigi jáne sapany baqylaý komıtetiniń tóraıymy Lıýdmıla Bıýrabekovanyń inbusiness.kz portalyna bergen málimeti boıynsha, elimizge ázirshe ekspress-testtiń 170 myń danasy jetkiziledi. Mınıstrlik qazirdiń ózinde koronavırýsqa tekseriletin azamattardyń tizimin jasap qoıǵan. Tizimdegiler «Olımp» klınıkalyq-dıagnostıkalyq ortalyqtarynda testti tegin tapsyrady. Olardyń qatarynda tynys alý joldarynyń syrqaty boıynsha dıspanserlik esepte turǵandar, áleýmettik jaǵdaıy álsiz toptar men qarttar bar.
Ekspress-testter kelip túsken ýaqytta Densaýlyq saqtaý mınıstrligi bul týraly resmı túrde jarııalaıdy. Budan keıin testten ótkisi kelgen barlyq adam zerthananyń saıtyndaǵy arnaıy anketany toltyrýy kerek. Ári qaraı anketa avtomatty túrde óńdeledi de azamattar birneshe topqa jikteledi. Ekspress-testten ótýge muqtaj topty mınıstrlik iriktep, olarǵa habarlasyp, úıine jaqyn ornalasqan zerthanalardyń birine baryp analız tapsyrýǵa shaqyratyn bolady.
Qymbat TOQTAMURAT