Batys Qazaqstan oblysynda sáýirdiń alǵashqy kúngi málimet boıynsha provızorlyq gospıtalde JRVI belgileri bar 62 adam, karantındik gospıtalde aýrýmen qarym-qatynasta bolǵan 28 adam baqylaýda jatyr.
«Batys Qazaqstan oblysynyń aýmaǵynda epıdemıologııalyq jaǵdaı salystyrmaly túrde turaqty» deıdi Batys Qazaqstan oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaev.
Aıta keteıik, 2020 jylǵy 29 naýryzda Batys Qazaqstan oblysynda koronavırýstyq ınfeksııasynyń eki jaǵdaıy tirkelgen bolatyn. Eki pasıent te oblystyq juqpaly aýrýlar aýrýhanasyna jatqyzyldy. Qazir olardyń jaǵdaıy qanaǵattanarlyq, qajetti em-dom alýda. Koronavırýs juqpasy tabylǵan úılerge dızenfeksııalyq jumystar júrgizildi.
- Epıdemııalyq tekseris barysynda naýqastarmen qarym-qatynasta bolǵan adamdar anyqtaldy. Bul tulǵalarǵa laboratorııalyq zertteý júrgizildi, saraptama nátıjesi olarǵa vırýs juqpaǵanyn kórsetti, - dedi Nurlybek Ermekuly.
Búginde oblystyq juqpaly aýrýlar aýrýhanasynda 2 adam, 92 adam stasıonarlyq karantınde jatyr. Provızorlyq gospıtalde JRVI belgileri bar 62 adam, oblystyń karantındik gospıtalinde aýrýmen qarym-qatynasta bolǵan 28 adam jatqyzyldy.
31 naýryz kúni Batys Qazaqstan oblysynyń Bas memlekettik sanıtarııalyq dárigeriniń «Batys Qazaqstan oblysynyń aýmaǵynda koronavırýstyq ınfeksııanyń (COVID-2019) taralýyna jol bermeý jónindegi sharalardy kúsheıtý týraly» qaýlysy shyǵyp, aýdandar men qala arasyndaǵy baılanysqa kóptegen shekteý qoıyldy. «Oblys turǵyndaryn qabyldanǵan shekteý sharalaryna túsinistikpen qarap, barlyq saqtyq sharalaryn saqtaýlaryn suraımyz» deıdi Batys Qazaqstan oblysy Taýarlar men kórsetiletin qyzmetterdiń sapasy men qaýipsizdigin baqylaý departamenti.
Batys Qazaqstan