Shymkent qalasy Eńbekshi aýdanynda 116 kásipkerlik nysany jumysyn toqtatty. Atap aıtqanda, 28 meıramhana, 3 saýda – oıyn-saýyq ortalyǵy, 36 monsha kesheni, 13 bılıard, 18 ınternet klýby jáne 18 býkmekerlik keńse jabyldy. Bul týraly aqparattyq-kommýnıkasııalyq ortalyqta ótken brıfıngte Eńbekshi aýdanynyń ákimi Ǵalymjan Ilııasov aıtyp ótti.
- Aýdan aýmaǵyndaǵy Evrazııa, Benefıs, Ásel, Altyn Orda bazarlarynyń jumysy toqtatyldy. Al, Isataı, Kóktem bazarlary men Aına bazarynyń azyq-túlik satatyn bóligi 10:00-den 18:00-ge deıin shekteýli rejımde jumys isteýde. Eńbekshi aýdany «Aına» bazaryndaǵy «Kóktem» avtobeketi óz jumysyn aǵymdyǵy jyldyń 25 naýryzynan bastap toqtatty, - dedi aýdan ákimi.
Ǵ.Ilııasovtyń aıtýynsha, «Fosforshylar» saraıy men «Ásel» bazarynyń aldynda apta saıyn ótetin azyq-túlik jármeńkeleri de jumysyn toqtatqan. Sonymen birge, aýdandaǵy telefon satatyn 7 dúken ýaqytsha jabylǵan.