«Áleýmettik medısınalyq saqtandyrý qory Qazaqstandaǵy medısınalyq kómek júıesine (MÁMS) qatyspaıtyn azamattarǵa qyzmet kórsetý úshin ishki rezervterden 20 mlrd teńge bóledi», dep habarlady osy qordyń basqarma tóraǵasy Aıbatyr Jumaǵulov.
Onyń aıtýynsha, árbir azamat medısınalyq qyzmet alýǵa quqyly. Ol aǵymdaǵy jyldyń 1 sáýirinen bastap Qazaqstanda mindetti áleýmettik medısınalyq saqtandyrý júıesi tolyǵymen jumys isteýi kerek ekenin eske saldy. Biraq, koronavırýstyń taralýyna baılanysty tótenshe jaǵdaıdyń engizilýin eskere otyryp, el Prezıdentiniń tapsyrmasy boıynsha túpkilikti kóshý 1 sáýirden 1 shildege aýystyryldy.
Áleýmettik mártebege jáne saqtandyrý mártebesine qaramastan, árbir azamat saqtandyrylǵan bolyp sanalady. Bul oǵan medısınalyq kómek pen áleýmettik saqtandyrýdyń kepildendirilgen kólemi aıasynda medısınalyq qyzmet alýǵa múmkindik beredi.
Qor basshysynyń aıtýynsha, bólingen qarjy qosymsha 2,5 mıllıon qazaqstandyqqa saqtandyrý kompanııalarynyń kómegimen tegin emdelýge múmkindik beredi.
«Kelesi toqsanda bul san ulǵaıýy múmkin», dedi Jumaǵulov.
Búgin osy jańalyqqa qatysty shuǵyl onlaın jıyn ótkizgen saqtandyrý kompanııalarynyń músheleri salanyń alǵa jyljýyna múmkindik beretin basym baǵyttardy belgilep alý qajettigin, basymdyq densaýlyqty saqtandyrý salasyna bóliný qajettigin aıtty. Sebebi bul másele talaı jyldan beri aıtylyp kele jatqanymen, onyń múmkindigin qoldanǵandar az bolatyn.
Saqtandyrý salasynyń ókili G. Ysqaqovanyń túsindirýinshe, densaýlyqty saqtandyrý aldaǵy ýaqytta salanyń lokomotıvine aınalýy ábden múmkin eken. «Osy kúnge deıin densaýlyǵyn saqtandyrǵysy keletinderdiń úles salmaǵy 2 paıyzǵa deıin jetpeıtin» dep aıtyp ótti ol.
Sondaı-aq G. Ysqaqovanyń túsindirýinshe, MÁMS-ke qatyspaıtyn azamattarǵa qyzmet kórsetý úshin ishki rezervterden 20 mlrd bólgeni durys sheshim. Sebebi densaýlyq salasyn saqtandyrý máselesi sóz bolǵanda, basyn ashyp alýy tıis máseleler qordalanyp qalǵan bolatyn. Munyń eń ózektisi klıenttiń saqtandyrý salasy boıynsha emhanalardy tańdaý múmkindigi. Kúni keshege deıin saqtandyrý salasy boıynsha tegin qyzmet memlekettik bıýdjetke qaraıtyn mekemelerde ǵana kórsetiledi degen túsinik qalyptasty. Al ondaǵy jalaqynyń azdyǵynan, bilikti mamandardyń aqyly emhanalarǵa aýysyp ketkeni jasyryn emes. Al aqyly emhanalar kúni keshege deıin densaýlyqty saqtandyrý salasy boıynsha ustanymdaryn ashyq aıtpaı kelgen. Olar bul ustanymdaryn «saqtandyrylýshynyń jeke esebinde jınalatyn qarjy kólemi tym az, biz mundaı qarjymen jumys istesek, shyǵynǵa batamyz» dep túsindirip kelgen.
«Endigi másele memleketten bólingen qarjynyń qandaı joldarmen bólinetindigine baılanysty. Memlekettiń qarjysyna ıek artpaı, bul salaǵa ınvestorlar tartyp, solardyń bólgen qarjysymen emdeý qyzmetin halyqqa birdeı qol jetimdi etýdiń múmkindikterin qarastyrý kerek. Memleket muny eki-úsh jyl baqylaýǵa alsa, kelesi bes-jyldyqtarda kompanııalar qor jınap, halyq jeke shotyndaǵy qarjysyn kóbeıtip alady. Biz osy arqyly ǵana MÁMS arqyly kórsetiletin medısınalyq qyzmet túrleriniń sanyn kóbeıte alamyz» deıdi G. Ysqaqova.
G. Ysqaqovanyń túsindirýinshe, eldegi keıbir qaltaly azamattar óziniń densaýlyǵyn sheteldik saqtandyrý kompanııalyna saqtandyrýǵa basymdyq beretinin de aıtyp ótti. Qazir, Qazaqstanda, orta esepppen 5-6 eldiń saqtandyrý kompanııadlary ózderiniń qyzmetin onlaın túrinde usyna bastady. Olardyń kóbeıip ketkeni sonshalyqty, keı kezde onyń qyzmetine kúmán týdyra bastaǵan.
«1 shildegi deıin saqtandyrý segmentin qaıda tirkelgeni belgisiz sheteldik kompanııalardan tazartý kerek. Jalpy, halyqtyń densaýlyǵyn saqtandyrý salasy memlekettiń baqylaýynda bolýy tıis dep oılaımyn. Memleket bul salany baqylaýda ustaý arqyly kompanııalardyń jumysyn baqylaı alady. Bul rette ózderin saqtandyrý kompanııalarymyz dep tanystyratyn alaıaq kompanııalardyń halyqtyń senimine kirip, jer soqtyryp ketýine bolmaıdy. Halyqtyń densaýlyǵyn saqtandyrýǵa bólgen qarjysy bir ortalyqqa túsip, sodan keıin kelisim shartqa otyrǵan emhanasyna bóliný kerek. Sol kezde ǵana qazaqstandyqtardyń bári otandyq kompanııalarǵa basymdyq beredi» dep sózin túıindedi G. Ysqaqova.
Eske sala keteıik, koronavırýs Qazaqstanda 13 naýryzda anyqtalǵan bolatyn.
16 naýryz kúni saǵat 8:00-den bastap Prezıdent Qasym-Jomart Toqaevtyń jarlyǵymen Qazaqstanda Tótenshe jaǵdaı jarııalandy.
19 naýryzdan bastap Nur-Sultan men Almatyda karantın engizildi.
1 sáýirde Qazaqstanda 369 adam koronavırýs juqtyrǵan, 25-i saýyǵyp, úsheýi qaıtys bolǵan.