Qaýipti vırýspen betpe-bet kelý ońaı deısiz be? Ásirese, qaýipti dert juqtyrǵan jandardyń ómiri úshin janyn shúberekke túıgen medısına salasynyń qyzmetkerleri antyna adaldyq tanytýda. Qazir Atyraýdaǵy №2 oblystyq aýrýhananyń ınfeksııalyq stasıonarynda koronavırýs juqtyrǵan naýqastar emdelip jatyr. Aýrýhana dırektorynyń orynbasary Nadıa Erǵalıevanyń aıtýynsha, dárigerler, medbıkeler men feldsherler, tazalyqshylar 27 naýryzdan beri táýlik boıy jumys isteýde.
– Infeksııalyq bólimshede 6 dáriger-ınfeksıonıst, 3 reanımatolog bar. Báriniń de tájirıbesi mol. Qazir 9 dárigerdiń bári óz mindetin kúni-túni atqarýda. Aýrýhana ákimshiligi hırýrgııa jáne terapııa bólimshelerin bosatyp, demalys bólmesi retinde jasaqtap berdi. Qazir bizdiń dárigerler, medbıkeler men laboranttar, tazalyqshylar úshin qolaıly jaǵdaı jasaldy. Olar táýligine 6 ret tamaqtanady. Táýligine birneshe ret dýshqa túsedi, kıimderin aýystyrady, - deıdi aýrýhana dırektorynyń orynbasary Nadıa Erǵalıeva.
Onyń aıtýynsha, ınfeksııalyq bólim úsh aımaqqa bólýge bolady. Birinshisi –taza aımaq. Dál osy jerde dárigerler naýqastarǵa barmas buryn arnaıy kıim kıedi. Onyń ishinde hırýrgııalyq shalbar, qorǵanysh kostıými, kózildirik, respırator, eki danadan bir rettik medısınalyq qolǵap, rezeńke aıaq kıim, bahıla bar. Naýqastar jatqan bólim aýmaǵyna kirgennen munyń birde-birin sheshýge bolmaıdy. Demek, sý ishý de, tipti dárethanaǵa barý da múmkin emes.
Ekinshisi – naýqastar em alyp jatqan aımaq. Munda dárigerler naýqastarǵa em júrgizedi. Olardyń jaǵdaıyn tekserip, dene qyzýyn, qaterli derttiń belgilerin baqylaıdy. Sodan soń ǵana taza aımaqqa shyǵady. Sol kezde medısınalyq qyzmetkerler kıgen arnaıy kıim joıylady. О́zderi dýshqa túsip, beti-qolyn óńdeýden ótkizedi. Munyń bári tazalyq aımaǵynda júrgiziledi.
Úshinshisi –jumys isteý aımaǵy. Bul jerde ár naýqastyń qyzýy, jalpy jaǵdaıy týraly málimetter elektrondy jýrnalǵa jazylady. О́zge aımaqtardaǵy áriptesterimen beınebaılanys arqyly keńesedi. Dál osylaı aýysym saıyn qaıtalanady. Demalys aımaǵyndaǵy jatyn bólmeleri qajetti jıhazben jabdyqtalǵan.
– Alǵashqy kúni ońaı bolǵan joq. О́ıtkeni, medısınalyq qyzmetkerlerdiń eshqaısysy buryn dál osyndaı qaýipti ınfeksııa juqtyrǵandarmen tikeleı jumys istemegen. Bárimizde de qorqynysh boldy. Keıbiri kóz jasyna erik berdi. Infeksııalyq bólimde arnaıy kıimmen júrý de qıyndyq týdyrdy. Ystyq, qapyryq aýada júrgendeısiń. Ár sát saıyn «ınfeksııa juǵa ma?» degen alańdaýshylyq bolatyny ras. Keıin oblystyq densaýlyq saqtaý basqarmasy bizdiń aýrýhanaǵa tájirıbeli eki psıhologty jiberdi. Olar medısınalyq qyzmetkerlermen, naýqastarmen áńgimelesip, arnaıy jumys júrgizdi. Bizdiń ujym 27 naýryzdan beri jańa rejımmen, jańa yrǵaqpen jumys isteýge beıimdeldi. Qazir jumysymyz qalypqa tústi, - deıdi Nadıa Erǵalıeva.
Nadıa Erǵalıevanyń pikirinshe, dárigerler men medbıkelerdiń, laboranttar men tazalyqshylardyń aýrýhanadan tysqa shyqpaǵanyna aptadan asty. Árıne, otbasy jylýyn, balalaryn saǵynǵany daýsyz. Alaıda, eshqaısysy shaǵym aıtpaǵan. Bári de aq halattaı appaq abyroıyna daq túsirmeı, naýqastardyń ómirin saqtap qalýǵa jumylyp otyr.
– Biz ázirge ınfeksııalyq stasıonardan tys aýmaqqa shyǵa almaımyz. О́ıtkeni, qaýipti dertke shaldyqqandarmen tyǵyz baılanysta jumys isteımiz. Atyraýda indettiń alǵashqy oqıǵasy tirkelgen kúnnen beri osyndamyz. Týystarymyzben telefon arqyly baılanystamyz, - deıdi №2 oblystyq aýrýhana dırektorynyń orynbasary Nadıa Erǵalıeva.
Joldasbek KО́ShERBAIULY
Atyraý oblysy