Búgin tań atqaly beri sarapshylar «Sońǵy kúnderi teńge nege qymbattady, bul baǵany qansha ýaqyt ustap turady?» degen suraqqa ár qyrynan kelip, jaýap berýge tyrysyp jatyr. Qoldanbaly ekonomıkalyq zertteýler ortalyǵynyń basqarýshy dırektory Oljas Tóleýov Tengenomika telegrammasynda osy suraqqa jaýap beripti.
Sarapshynyń pikirinshe, qazirgi baǵa ýaqytsha. Teńgeniń taǵdyry OPEK + elderiniń kezekti bas qosýynyń nátıjesine baılanysty. Osy jıynǵa Brazılııa, Kanada, Norvegııanyń qatysýǵa nıet tanytýy munaıdyń álemdik baǵasyn barreline 33-34 dollar aralyǵynda ustap turýǵa múmkindik berdi.
«Osyǵan baılanysty, teńge qymbattady. 1 AQSh dollary 438,8 teńgege deıin tómendedi. Sonymen qatar, Brent baǵasynyń barreli úshin 40 dollarǵa deıin ósýi múmkin, OPEK + aıasynda munaı óndirýdi qysqartý týraly jańa kelisimderge qol jetkizilse 1 AQSh dollarynyń baǵasy 425-430 dálizinde saqtalady. Alaıda, kelissózder sátsiz bolǵan jaǵdaıda USD- KZT 445-448 belgisine qaıta oralýy múmkin», dep jazdy Oljas Tóleýov.