«Qyzyl Jarty Aı» qoǵamynyń Aqmola oblystyq fılıaly koronavırýspen kúreske jumylǵan alǵashqy uıymdardyń biri.
Olardyń ıgilikti isine oblys ortalyǵyndaǵy «Sanjar», «Kókshe sýsyndary», «Natýrprodýkt» jáne «Steklo sentr Kókshe» seriktestikteri kómek kórsetýde.
– Ázirge biz 120 otbasyna azyq-túlik jetkizdik. Bir-birimizge júrek jylýyn tógip, qolǵabysymyzdy tıgizbesek bola ma? Kómekke zárý jandar barshylyq. Olardyń basym kópshiligi qurt aýrýyna shaldyqqandar men ambýlatorııalyq em-dom qabyldaýshylar. Sonymen qatar, kópbalaly otbasylar men eńbek ardagerlerin de umyt qaldyrmaımyz,–deıdi «Qyzyl Jarty Aı» qoǵamy oblystyq fılıalynyń dırektory Ashat Ýáıisov.
Qıyndyqty el bolyp qana eńsere alamyz dep túısingen «Kókshe Treıd» seriktestiginiń ókili Svetlana Prodıýstyń aıtýyna qaraǵanda Kókshetaýlyq kásipkerler «Qyzyl jarty aı» qoǵamy kótergen bastamaǵa qyzý qoldaý bildirip otyr.
Qazirgi tańda sozylmaly syrqaty bar adamdar da kómek-qoldaýǵa zárý. Qoǵamnyń qamqorlyǵyn kórgen adamdar janashyr jandarǵa óz rızashylyqtaryn bildirip otyr. «Qyzyl Jarty Aı» qoǵamy ázirlegen áleýmettik qorjynǵa eń qajetti degen azyq-túlikter kiredi. Salmaǵy 10 keli. Atap aıtqanda, kúrish, qaraqumyq, un, makaron, buqtyrylǵan et, suıyq maı, nan jáne shaı. Eriktiler azyq-túlikti esik aldyna deıin onlaın-jetkizý qyzmetin júzege asyrýda.