«Jumyspen qamtýdyń jol kartasy» aıasynda 11 252 aqmolalyq jumyspen qamtylady dep kútilýde. Baǵdarlamany júzege asyrýǵa 45 mıllıard teńge bólinedi.
Búgingi tańda 4 baǵyt boıynsha 332 jobanyń tizimi daıyndaldy. Karantın kezinde jumyssyz qalǵan aqmolalyqtar az emes. Sondyqtan, jumyspen qamtý ortalyqtary búginde jumyssyzdardyń tizimin jasaqtap, baǵdarlama aıasynda úgit-nasıhat sharalaryn onlaın rejımde júrgizýde.
Karantınge baılanysty jumyspen qamtý ortalyǵy mamandarynyń 50 paıyzy qashyqtyqtan jumys isteýge kóshirilgen. Sondyqtan, ortalyqtyń esigi qaýipsizdik maqsatynda ázirge jabyq. Degenmen,qajetti mamandardyń baılanys nómirleri jazylǵan. Ortalyq dırektorynyń aıtýynsha, ázirge shtattyq rejımde jumys istep jatqan mamandar jumyssyzdardyń tizimin ázirlep, olardy jol kartasy aıasynda ashylatyn bos jumys oryndaryna baǵyttaýǵa ázirlik júrgizýde.
–«Jumyspen qamtýdyń jol kartasy» aıasynda Kókshetaý qalasy boıynsha 50 joba júzege asyrylmaq. Barlyǵy 3 myńǵa jýyq jańa jumys orny ashylady dep kútilýde. Onyń 1,5 myńy jumyspen qamtý ortalyqtary arqyly jumysqa tartylýy tıis. Iаǵnı, jol kartasy aıasynda ashylatyn jumys oryndaryna qajetti mamandar, bizdiń ortalyq arqyly da tartylady,–deıdi Kókshetaý qalalyq jumyspen qamtý ortalyǵynyń dırektory Ýaqyt Beısenbaev.
Ortalyq dırektory jumys izdeýshilerge jergilikti jumyspen qamtý ortalyqtarynyń elektrondy júıesin tolyǵymen paıdalanýǵa keńes beredi. Al, iri qalalarda eńbek etip, jumyssyz qalǵan jastar óz eldi mekenderinde «Jumyspen qamtýdyń jol kartasy»aıasynda ornalasa alady. Ol úshin jastarǵa birjolǵy 85 myń teńge kóterme aqy tólenedi.
–«Jumyspen qamtýdyń jol kartasy» aıasynda oblysta 332 joba júzege asyrylady. Infraqurylymdyq jobalar 4 baǵytta qarastyrylǵan. Basymdyq áleýmettik salaǵa berilip otyr. Sonymen qatar, turǵyn úı-kommýnaldyq baǵytta 61 joba, eldi mekenderdi abattandyrý baǵytynda 21 joba qarastyrylǵan. Baǵdarlama aıasynda jumysqa tartylǵandarǵa 85 myń teńgeden kem eńbekaqy tólenbeıdi,–deıdi oblystyq jumyspen qamtý jáne áleýmettik baǵdarlamalardy úılestirý basqarmasy jetekshisiniń orynbasary Sholpan Rahmatýllına.
«Jumyspen qamtýdyń jol kartasy» aıasynda óńirde barlyǵy 11 myń 252 jańa jumys orny ashylmaq. Al, baǵdarlama aıasynda iske qosylǵan 12 joba turaqty 441 jańa jumys ornynyń ashylýyna múmkindik bermek.