Tótenshe jaǵdaıǵa baılanysty azamattardyń keıbir sanatyna belgilengen 42500 teńge kólemindegi áleýmettik kómek alýǵa 830 myńnan astam Almatylyq ótinish bergen. Onyń 360 myńnan astamy atalmysh kómekti alyp ta úlgergen. Qalalyqtarǵa beriletin qarjynyń jalpy somasy 15 mlrd 3 mıllıon teńgeni qurap otyr.
Bul soma ary qaraı da ulǵaıa bermek. Tólemge ótinim qabyldaý áli de jalǵasyp jatyr. Jalpy respýblıka boıynsha tıisti járdemaqyny alýǵa 6 mln 300 myńǵa jýyq adam aryz berip, onyń 3 mıllıonnan astamyna 42500 teńge berilgen.
«Azamattardyń kópshiligi málimetterin qate bergen jáne BJT kesh nemese keıin tólep erte aryz bergen. Onyń ishinde el aýmaǵynan shyǵyp ketken azamattardyń, qaıtys bolǵan azamattardyń atynan da berilgen ótinishter bar. Qazir bizde qaıtarý jumystary júrip jatyr», – deıdi qalalyq Áleýmettik ál-aýqat basqarmasy basshysynyń orynbasary Danııar Álkebaıuly.