Asa aýyr salmaq dárejesinde birneshe beldi nusqa boıynsha álem chempıony atanyp otyrǵan áıgili kásipqoı boksshy Entonı Djoshýa aldaǵy ýaqytta kimdermen kúsh synasqysy keletinin jarııa etti.
30 jastaǵy alty boksshynyń esimderin ataǵan eken. Olar – Taıson Fıýrı, Deonteı Ýaılder, Djarrell Mıller, Aleksandr Ýsık, Lýıs Ortıs jáne Adam Kovnaskıı. Búgingi tańda osy jigitterdiń barlyǵy da aýyr jáne asa aýyr salmaqtaǵy úzdikter sanatyna erkin engen sańlaqtar. Aıtýly bylǵary qolǵap sheberleriniń kórsetkishteri mynadaı:
31 jastaǵy Ulybrıtanııa ókili Taıson Fıýrı 31 kezdesý ótkizip, 30 ret jeńiske jetti. 21 qarsylasyn nokaýtqa jiberdi. Bir báseke teń eseppen aıaqtaldy.
34 jastaǵy AQSh sportshysy Deonteı Ýaılder 44 kezdesý ótkizip, 42 ret jeńiske jetti. 41 qarsylasyn nokaýtpen utty. Bir ret utylyp, taǵy bir bir básekede teń esep tirkeldi.
31 jastaǵy AQSh boksshysy Djarrell Mıller 24 kezdesý ótkizip, 23 ret jeńiske jetti. 20 qarsylasyn nokaýtqa jiberdi. Bir báseke teń eseppen aıaqtaldy.
33 jastaǵy Ýkraınanyń maqtanyshy Aleksandr Ýsık 17 kezdesý ótkizip, barlyǵyn óz paıdasyna sheshti. 13 qarsylasyn nokaýtpen utty.
41 jastaǵy Kýba qabylany Lýıs Ortıs 35 kezdesý ótkizip, 31 ret jeńiske jetti. 26 ret aıqyn basymdyq tanytty. Eki ret utylyp, taǵy eki jekpe-jektiń nátıjesi esepke alynǵan joq.
31 jastaǵy Polshanyń ókili Adam Kovnaskıı 21 kezdesý ótkizip, 20 ret mereıi ústem boldy. 15 qarsylasyn nokaýtqa jiberdi.
Al Entonı Djoshýanyń ózi bolsa, 30 jasta. Anglııanyń Ýotford qalasynda týyp-ósken ol kezinde áýesqoılar arasynda Olımpıada chempıony, álem chempıonatynyń kúmis júldegeri atandy. 2013 jyldan beri kásipqoı rıngte óner kórsetip júrgen Djoshýa 24 jekpe-jek ótkizip, sonyń tek bireýinde ǵana utyldy. 21 qarsylasyn esinen tandyrdy. Ataqty boksshy bul kúnderi WBA nusqasy boıynsha sýperchempıony, IBF pen WBO nqsqasynyń chempıony.