Almatynyń Jedel shtaby «Ata-ana kúninde» beıit basyna barmaýǵa shaqyrdy. Pravoslav dininiń saltyna sáıkes, 28 sáýir «Ata-analar kúni» qarsańynda Almaty qalasy ákimdiginiń janynan tótenshe jaǵdaı rejımin qamtamasyz etý jóninde qurylǵan Jedel shtaby indetti aýyzdyqtaý maqsatynda turǵyndarǵa adamdar kóp jınalatyn jerlerge, sonyń ishinde, shirkeýler men beıitterge barmaýǵa keńes beredi.
Bıyl karantınge baılanysty zıratqa tek jerleý rásimderin júrgizý úshin barýǵa ruqsat etilgen.
Qaladaǵy zıratqa adamdardyń toptasyp jınalýyn boldyrmaý úshin Polısııa departamenti kezekshilik uıymdastyrmaq.
Buǵan deıin Ortalyq kommýnıkasııalar qyzmetiniń alańynda ótken baspasóz konferensııasynda Astana jáne Qazaqstan mıtropolıti Aleksandr ǵıbadathanalardaǵy Qudaıǵa qulshylyq etý salttary jabyq rejımde ótetinin habarlaǵan bolatyn. Marqumdardyń esimderi jazylǵan hattardy zamanaýı kommýnıkasııa quraldary arqyly, ıaǵnı elektrondy poshta nemese messendjerlerdi paıdalana otyryp ǵıbadathanalarǵa joldaýǵa bolady.
Karantın aıaqtalǵannan keıin búkil Qazaqstan boıynsha pashalyq senbilerdiń birinde marqumdardy eske alý úshin qudaıǵa qulshylyq etý rásimderi saltanatty túrde ótedi.