Koronavırýsqa baılanysty birneshe ret keıinge shegerilgen UFC 249 týrnıri 9 mamyr kúni AQSh-tyń Florıda shtaty aýmaǵynda ótetin boldy.
Jer-jahandy koronavırýs indeti jaılap turǵan kezde jarysty ótkizýdiń ózi de ońaıǵa soqpaıdy. Tipten, osy áreketi úshin UFC uıymynyń prezıdenti Dana Ýaıt san márte syn sadaǵyna da ilikti. «Kúlli álem jurtshylyǵynyń basyna úlken qaýip-qater tónip turǵanda jarys uıymdastyrýdyń qajeti joq edi-aý», «Ýaıt tek paıdany ǵana oılaıdy. Aqsha dese, ol aryn satýdan taıynbaıdy», degen syńaıdaǵy áńgimelerdi de qulaǵymyz shaldy. Biraq aıtqanynan qaıtpaıtyn birbetkeı bıznesmen aqyry jarys ótkizýdiń jolyn tapty.
Esterińizge sala keteıik, osy týrnırdiń basty jekpe-jegi jeńil salmaq dárejesi boıynsha «ýaqytsha chempıon» ataǵy úshin AQSh-tyń qos sańlaǵy Tonı Fergıýson men Djastın Getjı arasynda ótedi.