Memleket basshysy Qasym-Jomart Toqaevtyń bastamasymen juqpaly indetpen kúresýge jumylǵan otandyq dárigerler eńbegin baǵalaýdyń jańa sharasy jasaldy. Bul baǵyttaǵy jumystar koronavırýs ınfeksııasymen kúreske tartylǵan medısına mamandarymen qosa, quqyq qorǵaý salasynyń qyzmetkerlerine syıaqy berý máselesin de qarastyrady.
Mysaly, endi «Qaýiptiligi asa joǵary» sanatyna jatatyn reanımasııa bólimsheleri men ınfeksııalyq stasıonarlarda jumys isteıtin dárigerler men orta jáne kishi medısına qyzmetkerleriniń eńbekaqysyna 20 ese ústemeaqy tólenedi. Iаǵnı medısına qyzmetkeriniń aılyq tabysy 850 myń teńgege deıin jetedi. Al «Qaýiptiligi joǵary» sanatqa kiretin provızorlyq stasıonarlar men jedel járdem dárigerleri men orta jáne kishi medısına qyzmetkerlerine tólenetin ústemeaqy 10 ortasha aılyq tabys kóleminde belgilenip, olarǵa beriletin eńbekaqy 425 myń teńge shamasynda bolmaq. Sondaı-aq «Qaýiptiligi ortasha» sanattaǵy karantındik stasıonar dárigerleri men orta, kishi medısına qyzmetkerleri, sanıtar-dárigerler, memlekettik qyzmetshiler men jedel járdem kóliginiń júrgizýshilerine de 5 ese ústeme tólenip, aılyq tabystary 212,5 myń teńgeni quramaq.
Osy maqsatta jumsalatyn qarjy kózin esepteý Almaty oblysynda da júrgizilýde. О́ńirdegi dárigerler men tártip saqshylaryn qarjylaı qoldaý úshin oblystyq bıýdjetten 137 mln teńge bólinedi.
– Birinshi kezekte syıaqy medısına qyzmetkerlerine beriledi. Bul maqsatqa biz 137 mln teńge bóldik. Odan keıin qaýipti ınfeksııanyń taralýyn toqtatý úshin halyqtyń densaýlyǵy men ómirin saqtaý úshin postta kúni-túni jumys istep júrgen polısııa qyzmetkerlerine, basqa da qyzmetterdiń, jergilikti atqarýshy organdardyń qyzmetkerlerine de syıaqy taǵaıyndalady, – deıdi oblys ákimi.
Sondaı-aq oblys ákimi barlyq sanıtarlyq posttar men blok-beketterde kúsheıtilgen rejimde jumys isteýdi jalǵastyrý kerektigin aıtty. Qazir oblys boıynsha barlyǵy 103 post ashylǵan. Onyń ishinde 57 sanıtarlyq beket jáne 46 karantındik blok-post táýlik boıyna jaǵdaıdy qadaǵalaýda.
Almaty oblysynyń Eńbekshiqazaq aýdanyna qarasty Shelek aýylyndaǵy ortalyq aýrýhana ǵımaraty kúrdeli jóndeýden keıin qaıta ashyldy. Elý jyl buryn salynǵan nysanǵa sodan beri birde-bir ret qurylysshylardyń qoly tımegen eken. Ǵımaratty jańǵyrtýǵa respýblıkalyq bıýdjetten 484 mln teńge jáne oblystyq qazynadan 196 mln teńge qosymsha qarjy jumsaldy. Bul qarajatqa qurylys jumysynan bólek aýrýhana mańyn kóriktendirý jumysy júrgizilip, em alýshylarǵa sapaly qyzmet kórsetýge qajetti barlyq medısınalyq qurylǵylar da satyp alynypty.
Qazir ortalyq aýrýhanada 2 operasııa zaly jańadan ashylǵan. Emhana sońǵy úlgidegi rentgen apparaty, ýltra dybystyq zertteý kabıneti men basqa da naýqas boıyndaǵy dertti erte anyqtaýǵa arnalǵan qurylǵylarmen jabdyqtaldy. Tipti aýyldyq aýrýhanaǵa keıbir aýdan ortalyǵynyń qoly jetpeı otyrǵan jasandy tynys alý apparaty qoıylǵan. Al aýrýhanada 180 adam jatyp em-dom qabyldasa, emhanaǵa kelgen 310 qaralýshy bir mezette dáriger tekserýinen óte alady. Qajetti mamandar da jetkilikti eken.
Qazir Shelek aýrýhanasynda 555 adam jumys isteıdi. Onyń ishinde 73 dáriger, 269 orta deńgeıli medısına qyzmetkeri bar.
Almaty oblysy