Qazirgi kúnderi Almatydaǵy №1 Qalalyq aýrýhananyń bosaný blogynda Covid-19 dıagnozy rastalǵan 6 áıel bar, onyń ekeýi bosansa, karantınde 24 júkti áıel jatyr.
Búgin Almatydaǵy provızorlyq ortalyqqa oqshaýlanǵan 32 jastaǵy áıel bosanyp ta, emdelip te shyqty.
Aıaǵy aýyr kelinshek 12 sáýirde №1 Qalalyq klınıkalyq aýrýhanaǵa 38 gradýstan joǵary dene qyzýymen, jótel, tamaqtyń jybyrlaýy syndy kataraldy sımptomdarmen kelip tústi.
Alaıda, júkti áıel aýrýhanaǵa kelip túsken kezde odan koronavırýstyq ınfeksııaǵa taldaý alynyp, indet juqtyrmaǵany anyqtalǵan edi.
Ol 14 sáýirde 2 kúnnen keıin salmaǵy 3 kg-dan asatyn balany dúnıege ákeldi.
«Meniń karantınde jatyp bosanýyma týra keldi, – dedi Ajar Manhanova, – Bul meniń tuńǵyshym bolǵandyqtan óte qatty ýaıymdap edim. Buǵan deıin qasyma serik bolatyn adammen týýdy josparlaǵanmyn, biraq bosaný ýaqytym karantınge dál keldi. Biraq medısına qyzmetkerleri kórsetken úlken qamqorlyqtyń arqasynda tipti jalǵyz ekenimdi sezbeı de qaldym. Meniń ata-anam qala syrtynda turady, olar da meni, balanyń jaı-kúıin ózim sııaqty qatty ýaıymdap otyrdy, azyq-túlikpen, tamaqpen meni kim qamtamasyz etedi dep ýaıymdap otyrdy. Biraq munda tamaq jaǵy óte jaqsy boldy, men eshteńeni qajetsinbedim. Stasıonardyń medısına qyzmetkerlerine úlken raqmet aıtqym keledi. Karantın kezinde men olardan kóp nárseni úırendim, jas analardyń kýrsynan óttim dep te aıtýǵa bolady».
«Búgin anasy ulymen birge baqylaý taldaýynan keıin úıge emdeýden shyǵaryldy. Anasy da, sábı de ózderin jaqsy sezinedi» – dedi stasıonar basshysy Ernest Qalıev.
ALMATY