Elordada butalar, aǵashtar men gúlzarlar otyrǵyzý jumystary belsendi júrip jatyr.
Qalanyń barlyq 4 aýdanynda «Astana – Zelenstroı» qyzmetkerleri 2 myńǵa jýyq qylqan japyraqty aǵash otyrǵyzdy.
«Aqan Seri kóshesinde eki qatar kóshet otyrǵyzyldy. Bórtegúl men qyzyl tal otyrǵyzdyq. Qazir olardy otyrǵyzý maýsymy. Ivany jergilikti tuqymnan ózimiz ósirdik. Vengr bórtegúli hosh ıis berip, qala sánin keltiredi. Qala ıgiligi úshin jumys isteımiz. Elorda turǵyndary men qonaqtaryna unaıdy degen senimdemiz. Eger árqaısymyz kem degende bir aǵash otyrǵyzsaq, qalamyz jasyl qalaǵa aınalady»,- dedi «Astana – ZelenStroı» JShS dırektorynyń orynbasary Bıbigúl Bektimisova.
Qazirgi ýaqytta aǵash otyrǵyzý jumystarymen kommýnaldyq qyzmetkerler ǵana aınalysyp jatyr. Karantın rejımi aıaqtalǵan soń qalany kógaldandyrýǵa elorda turǵyndary men qonaqtary da qatysa alady. Bıyl elordada 30 myń aǵash pen 6 mln-nan astam gúl otyrǵyzylady.