Qazaqstan Jýrnalıster odaǵynyń múshesi, «Qurmet belgisi» ordeni, «Astanaǵa 10 jyl» jáne «Eren eńbegi úshin» medaldarynyń ıegeri, memleket tarapynan birqatar Qurmet gramotasymen marapattalǵan Hamıt Birjanov elýinshi jyldardyń sońy men alpysynshy jyldary «Sosıalıstik Qazaqstan» (qazirgi «Egemen Qazaqstan») gazetinde eńbek etken edi.
Hamıt Birjanuly 1930 jyldyń 2 mamyrynda Soltústik Qazaqstan oblysy Shal aqyn aýdanynyń Qaratal aýylynda dúnıege keldi. 1947 jyly orta mektepti kúmis medalmen aıaqtaǵannan keıin Almatydaǵy Shet tilder ınstıtýtynda oqydy. Dıplom alǵannan soń biraz ýaqyt aıtýly bilim oshaǵynda ustazdyq etti.
Jańalyq ataýlyǵa qushtar jan. 1954 jyldan beri jýrnalıstıka salasyna myqtap den qoıdy. Birqatar aýdandyq, oblystyq jáne respýblıkalyq basylym men baspada eńbek etti. Solardyń arasynda «Sosıalıstik Qazaqstan» gazeti de bar. Respýblıkamyzdyń bas basylymynda partııa turmysy bóliminiń tilshisi jáne Qostanaı oblysyndaǵy menshikti tilshi qyzmetterin atqardy. О́z kásibine adal azamat Qostanaı óńirinde bolyp jatqan ár oqıǵany qaz-qalpynda baıandap, óz maqalalaryn oqyrmandarǵa der kezinde jetkize bildi. Sonymen qatar ol astyqty aımaqtaǵy tyń bastamalar men ıgi is-sharalar, jaǵymdy jańalyqtar men jańashyldyqtar jaıynda tebirene jazyp qana qoımaı, sheshimin tappaı qordalanyp qalǵan kúrdeli máselelerdi de óz nazarynan tys qaldyrǵan joq.
– «Sosıalıstik Qazaqstannyń» ardaqty aty talaı ret qysyltaıańda jol tabýǵa kómektesti, – dep bastady óz áńgimesin Hamıt Birjanuly. – 1962 jyly Qostanaıǵa Dinmuhamed Qonaev keldi. Sol kezderi Nıkıta Hrýshevtiń solaqaı saıasatynyń kesirinen Dımekeń respýblıkamyzdyń birinshi hatshylyǵynan túsip qalyp, Mınıstrler Keńesiniń tóraǵalyǵyna yǵystyrylǵan edi. Osyndaı asyl azamatpen júzdesip, syrlasýdyń da sáti tústi. Birde Qonaevtan kólik suraýǵa bekinip, qabyldaýyna jazyldym. Gazettiń bedeli ǵoı, kabınetke esh bógetsiz kirip, Úkimet basshysyna mán-jaıdy túsindirdim. Dımekeń sózge kelmesten, respýblıkamyzdyń beldi qos basylymynyń tilshilerine «Volga» kóligin mingizdi. Sol kezde keń júrekti azamattyń, dana ári dara basshynyń boıynan izgiliktiń ısi ańqyp turǵanyn anyq sezindim.
1965 jyly Almatydaǵy Joǵary partııa mektebin támamdaǵannan keıin Hamıt Birjanov Qostanaı oblysy Rýdnyı qalalyq partııa komıtetiniń hatshysy, qalalyq jáne oblystyq keńesteriniń depýtaty bolyp saılandy. 1971 jyly qyzmet babymen Almatyǵa aýysty. Áýelde «Sosıalıstik Qazaqstanda» nasıhat bóliminiń meńgerýshisi, kóp keshikpeı «Qaınar» baspasynyń bas redaktory boldy. Sodan keıin 20 jylǵa jýyq ýaqyt boıy Qazaq KSR Josparlaý komıtetinde bólim jáne basqarma bastyǵy qyzmetin atqardy.
Hamıt aǵanyń shyǵarmashylyq dıapazony da keń edi. Qarymdy qalamger baspasóz betterinde maqala jazýmen shektelip qalmaı, aýdarma isimen de belsene aınalysty. Marksızm-lenınızm klassıkteriniń eńbekterin, saıası jáne kórkem shyǵarmalardy, balalar ádebıetin qazaq tiline tárjimalady.
– «SQ»-da eńbek etken jyldardy erekshe bir saǵynyshpen eske alamyn. Sol kezderi talaı ıgi-jaqsylarmen etene aralasyp, syılastym. Dinmuhamed Qonaev bastaǵan basshylar, Sábıt Muqanov, Ǵabıt Músirepov, Ǵalı Ormanov, Márııam Hákimjanova, Syrbaı Máýlenov, Shyńǵys Aıtmatov, Tursynhan Ábdirahmanova, Saıfı Qudash jáne taǵy basqa kóptegen uly aqyn-jazýshy, kórnekti ǵalym, Keńes Odaǵynyń Batyrlary jáne túrli salalarda eleýli tabystarǵa qol jetkizgen ataqty adamdarmen dastarqandas boldym. Osynyń barlyǵy da respýblıkamyzdyń bas basylymynyń bedeliniń arqasy, – deıdi aqsaqal.
Bul kúnderi 90 jasqa tolǵan qart qalamger áli de tyń. Qazirgi kezde Birjan Hamıtuly Almaty qalalyq ardagerler keńesiniń tóralqa múshesi jáne Bostandyq aýdandyq ardagerler keńesiniń tóraǵasy qyzmetterin abyroıly atqarýda.