Birgemiz qorynan tólenetin tólemder jeti sanat boıynsha beriledi dep habarlaıdy elorda ákimdiginiń resmı saıty.
Nur-Sultan qalasynda «Biz birgemiz» aksııasy aıasynda 28 073 adam qamtylatyn kómektiń ekinshi kezeńi bastaldy. Atap aıtqanda, azamattardyń jeti sanaty 50 myń teńge kóleminde kómek alady. Olar AÁK alatyn az qamtylǵan otbasylar, eń tómengi zeınetaqy alatyn zeınetkerler, birinshi nemese ekinshi toptaǵy múgedektigi bar zeınetkerler, jetim balalar, soǵys ardagerleri jáne olarǵa teńestirilgen azamattar, sondaı-aq qaraýynda múgedek balalary bar otbasylar jáne tyl eńbekkerleri.
«Atalǵan kómek ár otbasyna bir ret ǵana beriledi. Iаǵnı, bir ret kómek alǵan adamdar ekinshi márte ala almaıdy. 28073 adam - atalǵan kómekke muqtaj alǵashqy kezeńde qamtylǵandardan ózge adamdar», – dep habarlady Nur-Sultan qalasynyń halyqty jumyspen qamtý jáne áleýmettik qorǵaý basqarmasy basshysynyń orynbasary Aıgerim Táńirbergenova.
«Biz birgemiz» aksııasy aıasynda kómektiń alǵashqy tolqyny barysynda elordanyń 14 478 turǵyny 50 myń teńge kóleminde qarjylaı kómek alǵan bolatyn.
«Eshkimge ótinim berýdiń qajeti joq. Biz barlyq málimetterdi Áleýmettik tólemderdiń vedomstvoaralyq esep aıyrysý ortalyǵynyń derekter qorynan áleýmettik qorǵaý basqarmasy arqyly alamyz. Iаǵnı, eger adam elordada resmı tirkelse, járdemaqy, zeınetaqy, AÁK jáne basqa da memlekettik járdemaqy túrinde qandaı da bir tólem alatyn bolsa, ol avtomatty túrde bizdiń tizimge enedi», – dep túsindirdi Nur Otan qalalyq partııasy fılıaly tóraǵasynyń birinshi orynbasary Erlan Kanalımov.
Esterińizge sala keteıik, azyq-túlik sebetterin alýǵa ótinimdi partııanyń qoǵamdyq qabyldaýy arqyly berýge bolady.