Soltústik Qazaqstandaǵy Taıynsha aýdanynyń turǵynynan 187 lıtr alkogoldik ónim alynǵan. Úı ıesi, 65 jastaǵy áıel buǵan deıin de araqty qoldan istep satqan. Kórshileri de bul týraly polısııaǵa habar bergen. Biraq sońǵy ýaqytqa deıin ol alkogol satýdy toqtatpaǵan. Soǵan qaraǵanda kerekti adamdarmen «bólisip» turǵan sııaqty.
Sońǵyda áıeldiń úıinen 37 ydysqa quıylǵan 187 lıtr spırt alynǵan. Bul joly ony kóshedegi maskúnemniń arqasynda polısııanyń zańsyz araq satýdy tekseretin emes, basqa qyzmeti ustaǵan. Aıaǵyn zorǵa basqan maskúnemdi ustaǵandar onyń qaltasynan 1,5 lıtrlik ydyspen alkogol ónimin tapqan. Qaıdan aldyń degen suraqqa maskúnem araq satýshynyń aty jóni men mekenjaıyn atap bergen. Osydan keıin onyń úıine júrgizilgen tekseris barysynda joǵaryda atalǵan spırt kólemi tabylǵan.
Alynǵan ishimdiktiń bári saraptamaǵa jiberildi. Atalǵan fakti boıynsha ÁQtK 463-baby 2-bóligi boıynsha ákimshilik materıal toltyrylǵan. Bul bap mundaıǵa 30 aılyq eseptik kórsetkish kóleminde aıyppul salýdy kózdeıdi. Budan buryn áıelge aqpan aıynda da aıyppul salynǵan bolatyn. Biraq odan aıylyn jıyp, aıaǵyn tartpaǵan. О́ıtkeni, aıyppuldyń áseri álsiz bolyp turǵan sııaqty.
«Jyl basynan beri zańsyz aınalymnan 400 lıtrden astam alkogoldik ónim alyndy. Barlyq sharalar quqyq buzýshylyqtar men qylmystardyń sebebi bolyp jatatyn maskúnemdikke qarsy kúreske baǵyttalǵan. Osy jyly alkogoldik masańdyqpen 200-den astam qylmys jasalǵan. Qoǵamdyq orynda masań kúıde júrgeni úshin 3647 adam ákimshilik jaýapkershilikke tartyldy. Májbúrlep emdelýge 62 soltústikqazaqstandyq jiberildi, taǵy 55 adamǵa qatysty emdelýge jiberý týraly sheshim qabyldandy», - dedi Jergilikti polısııa qyzmeti basqarmasynyń bastyǵy polısııa podpolkovnıgi Aıdyn Baımatov.
Soltústik Qazaqstan oblysy