Qadirli otandastar!
Qazaqstan Respýblıkasynyń Prezıdenti Qasym-Jomart Kemeluly Toqaev eldegi qalyptasqan tótenshe jaǵdaıǵa baılanysty taǵy bir mańyzdy málimdeme jasady. Málimdemege sáıkes el kóleminde tótenshe jaǵdaı merzimi 11 mamyrǵa deıin uzartyldy.
Iri qalalar men oblys ortalyqtary karantınge alynǵaly bir aıdan asty. Alaıda álemdegi koronavırýs indetiniń ýyty ázirge qaıta qoıǵan joq. Epıdemııalyq ahýal el bıligin jańadan sheshimder qabyldap, shuǵyl sharalar qoldanýǵa májbúrleıtini anyq. Prezıdent málimdemesi arqyly memleket úshin eń mańyzdysy – otandastarymyzdyń amandyǵy men densaýlyǵy ekenin taǵy bir márte atap ótti. Sondyqtan da jarııalanǵan sheshimderdi memleket tolyqtaı moınyna alyp otyrǵan osy mańyzdy mindet turǵysynan qabyldaýǵa tıispiz. Árıne karantın sharalary azamattardyń úırenshikti tirlikterinen bas tartyp, kúndelikti qajettilikterin shekteýge májbúrleıdi. Desek te, indettiń aty indet. Daýasy belgisiz derttiń betin qaıtaryp almaıynsha el bolyp karantındik sharttardy saqtaýǵa tıispiz.
Memleket búgingi kúnge deıin otandastarymyzdyń tótenshe jaǵdaıǵa baılanysty týyndaǵan máselelerine beıjaı qaramaıtynyn kórsetti, áli de kórsete bermek. Indet bastalǵan kúnnen Prezıdent Qasym-Jomart Kemeluly Toqaev jarııalaǵan áleýmettik paketter qajetti deńgeıde júzege asyrylyp keledi. Shaǵyn jáne orta bıznes ókilderin qoldaý sharalary aıasynda da memleket bıýdjetinen qyrýar qarjy qarastyryldy. Ásirese aýyl sharýashylyǵy salasynda kóktemgi egistik jumystary boıynsha tótenshe jaǵdaıǵa qaramastan, tıimdi sheshimder qabyldanyp, dala jumystarynyń ýaqtyly uıymdastyrylýy úshin sharýalarǵa qolaıly jaǵdaı jasaldy. Prezıdent jumysshy sanyn jáne eńbekaqy kólemin azaıtpaý maqsatynda elimizdegi iri kompanııalarǵa da tıisti qoldaý kórsetiletinin málimdedi. Koronavırýs indeti men jahandyq ekonomıkalyq daǵdarys elimizdiń ekonomıkasynyń kúretamyryna aınalǵan bul kompanııalardy da óz qyspaǵyna alýda. Atalǵan kásiporyndarda júz myńdaǵan azamatymyz eńbek etetinin eskersek, Prezıdent sheshiminiń áleýmettik mańyzdylyǵyn jete túsinemiz. Saıajaılar men úı mańyndaǵy shaǵyn sharýashylyqtar da nazardan tys qalmaıtyny aıtyldy. Bir sózben aıtqanda, Prezıdent Qasym-Jomart Toqaevtyń málimdemesinen osynaý syn saǵatta qıyndyqqa tap bolǵan elimizdiń eshbir azamaty qoldaýsyz qalmaıtynyn uǵyndyq. Memleket ózine tıesili mindetterin tıisinshe atqaryp jatyr. Mundaı sátte elimizdiń árbir azamaty sabyrlyq pen tózimdilik tanyta bilýi tıis. Sonda ǵana tosynnan kelgen qıyndyqty el bolyp eńsere almaqpyz.
Qurmetti otandastar, tótenshe jaǵdaıda sizder men bizderdiń saýlyǵymyz ben amandyǵymyzdyń kepili bolyp, bar jaýapkershilikti moınyna alatyn jalǵyz kúsh – ol memleket. Sondyqtan da elimizdiń azamattaryn Prezıdentimiz jarııalaǵan jańa sheshimderge qoldaý kórsetip, sabyrlyq pen tózimdilik tanytyp, el birliginiń eren úlgisin kórsetýge shaqyramyz.
«Aýyl» halyqtyq-demokratııalyq patrıottyq partııasynyń Saıası keńes tóralqasy