Nur-Sultan qalasynda 50-ge jýyq qoǵamdyq oryn abattandyrylady. Olardyń qatarynda saıabaqtar, tynymbaqtar jáne basqa da taza aýada serýendeýge arnalǵan oryndar bar. Bul týraly qala ákimdiginiń baspasóz qyzmeti habarlady.
Atalmysh oryndardyń basym bóligi «Jumyspen qamtýdyń jol kartasy» baǵdarlamasy aıasynda abattandyrylady. 10 jerde jumystar bastaldy. Elorda ákimi Altaı Kólginov Kóktal eldi-mekeninde ornalasqan «Kóktal» parkiniń qurylys barysymen tanysty. Saıabaq shetkeri aımaqtardy damytý baǵdarlamasy aıasynda salynyp jatyr.
«Turǵyndarmen kezdesýlerde, azamattardy qabyldaý barysynda olar saıabaqtar men tynymbaqtardy abattandyrý máselesin kóteredi. Eldimekenderdi damytýǵa kóp kóńil bólemiz. Qazir eldi-mekenderde 4 iri dene shynyqtyrý-saýyqtyrý keshenin salyp jatyrmyz. Bul buqaralyq sportty damytyp, jastardyń densaýlyǵyn nyǵaıtýǵa kómektesedi. Sonymen birge ashyq keńistikterdi abattandyrýǵa kiristik. Bul park turǵyndardyń súıikti oryndarynyń birine aınalýy úshin jumysty sapaly oryndaý qajet. Avtomatty sýarý júıesin oılastyrý kerek. Aýmaqty kútip ustaý mańyzdy», - dedi qala ákimi Altaı Kólginov.
Saıabaq aýmaǵy tynysh demalys aımaǵy, belsendi demalys aımaǵy jáne balalar demalys aımaǵy bolyp 3-ke bólinedi. Saıabaq aýmaǵynda 8 myń aǵash otyrǵyzý josparlanyp otyr. Sonymen birge elordada jol jumystary da bastaldy. Bıyl jalpy uzyndyǵy 100 km quraıtyn 150 kóshe jóndeýden ótedi. Sondaı-aq, 21 nysannyń jumysy jalǵasyp jatyr. Esil ózeni arqyly ótetin kópir qurylysy aıaqtalady. «Jumyspen qamtýdyń jol kartasy» baǵdarlamasy aıasynda 15 myń jańa jumys orny ashylady.