Túrkistan oblysynyń dıqandaryna elimizdegi tótenshe jaǵdaı keri áserin tıgizip otyrǵany málim. О́nimin ótkize almaı otyrǵan sharýalardyń janaıqaıyn jýyrda oblys ákimi О́mirzaq Shókeev Premer-mınıstrge jetkizgen de bolatyn. Mysaly, Maqtaaral aýdanynyń dıqandary bıyl 351,5 gektar jerge qyryqqabat egip, qazirdiń ózinde 3584 tonna ónim jınaǵan. Alaıda, kúlli álem halqyn úıinen shyǵarmaı qoıǵan pandemııa qyryqqabat óniminiń satylýyna kedergi jasap, naryqtaǵy baǵasyn kúrt tómendetip jiberdi.
Buǵan deıin sharýalarǵa elimizdegi blok-beketterden kedergisiz ótý úshin oblystyq aýyl sharýashylyǵy basqarmasy tarapynan barlyq oblystarmen memorandým túzilip, «Biz birgemiz!» logotıpin japsyryp alý arqyly ótý múmkindigi jasalǵan edi. Endi oblys ákimi О́mirzaq Shókeevtiń tapsyrmasymen Maqtaaral aýdanynda qyryqqabat ónimin ótkizý boıynsha arnaıy dıstrıbıýtor taǵaıyndalyp, sharýalardyń ónimin satýǵa kómek beriletin boldy. Aýdan ákimi Baqyt Asanov qyryqqabat ekken sharýalarǵa ónimin ótkizý boıynsha dıstrıbıýtor bolyp taǵaıyndalǵan jeke kásipker, aýdandyq máslıhattyń depýtaty Berik Shámpıevti tanystyrdy.
«Eger, sizdiń ekken qyryqqabatyńyz pisip daıyn bolsa, alaıda ónimińizdi satý boıynsha másele týyndap jatsa, aýdanymyzdyń dıstrıbıýtory Berik Shámpıevke habarlasýǵa bolady. О́nimińizdi eksporttaý nemese basqa oblystarǵa alyp baryp satý úshin qujattardy daıyndaýǵa kómektesip, júk kólikterin taýyp berýge múmkindikter jasaıtyn bolady», dedi Baqyt Asanov.
Túrkistan oblysy