Qyzylorda oblysynda polıseı tórt jastaǵy joǵalyp ketken balany taýyp, ata-anasyna tabystady. Bul týraly oblystyq Polısııa departamentiniń baspasóz qyzmeti habarlady.
30 sáýirde Jańaqorǵan kentinde tórt jasar bala kóshede oınap júrip, adasyp ketken. Balanyń úıden shyǵyp ketkenin áke-sheshesi de baıqamaı qalypty.
Osy kúni kent ortalyǵynda qyzmettik mindetin atqaryp júrgen aýdandyq polısııa bóliminiń ýchaskelik polısııa ınspektory Almas Abdýllaev pen ýchaskelik polısııa ınspektorynyń kómekshisi Erjan Aıtjanov kóshe boıyndaǵy bir qýystan kishkentaı balanyń daýsyn estıdi. Munyń tegin emestigin sezgen olar álgi aýmaqty sholyp, qarańǵy qýystan adasyp ketken búldirshindi tabady. Balanyń ózi eshteńe aıta almaǵan soń polısııa bóliminiń jeke quramyna habar berip, onyń úıin taýyp, ata-anasyna kishkentaıdy aman-esen tabystady.
Osydan birneshe kún buryn ǵana Almas Abdýllaev pen Erjan Aıtjanov óz-ózine qol jumsamaq bolǵan aýdan turǵynyn qutqaryp qalǵan bolatyn.