Shymkent qalasynyń turǵyny tótenshe jaǵdaı kezinde óz úıinde esirtki prıtonyn uıymdastyrdy. 22 sáýirde Shymkent qalasy Polısııa departamentiniń Esirtki qylmysyna qarsy is-qımyl basqarmasynyń qyzmetkerlerimen keshendi jedel is-sharalar júrgizý barysynda esirtki quraldaryn zańsyz daıyndaý, ótkizý jáne esirtki prıtonyn uıymdastyrý boıynsha kúdikti 34 jastaǵy jergilikti turǵyn ustaldy.
Tintý barysynda kúdiktiniń úıinde esirtki zattaryn tutynýǵa arnalǵan ǵımarat tabyldy. Barlyq aıǵaqty zattar tárkilendi.
Atalǵan jaıt boıynsha QR Qylmystyq kodeksiniń 297-babynyń 1-bóligi (esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) jáne 302-babynyń 1-bóligi (esirtki, psıhotroptyq zattardy, sol tektesterdi tutyný úshin prıtondar uıymdastyrý nemese olardy ustaý jáne osy maqsattar úshin úı-jaılar berý) boıynsha sotqa deıingi tergeý júrgizilip jatyr.