Qyzylordada Otan qorǵaýshylar kúni men Jeńistiń 75 jyldyǵyn merekeleý aıasynda birqatar onlaın sharalar júzege asyrylady. Bul týraly búgin óńirlik kommýnıkasııa qyzmetinde oblystyq ishki saıasat basqarmasy basshysynyń mindetin atqarýshy Erkin Ábishev habarlady.
Sharalar oblys ákiminiń onlaın quttyqtaýymen bastaý alyp, jańadan iske qosylǵan «Syr shańyraǵy» youtube kanalyndaǵy «El erteńi - jas ulan» atty áskerı patrıottyq konsertke jalǵasady.
Sondaı-aq oblys mýzeıleri men kitaphanalarynda «Syr eliniń qaharman uldary» atty taqyryptyq vırtýaldy kórmeler, jas sarbazdardyń «Men – áskerdemin» beıne chellendji ótkiziledi.
Oblys boıynsha ortalyq kósheler men Taǵzym alańdaryna taqyrypqa saı bezendirý jumystary jasaldy. Qyzylorda qalasy jáne barlyq aýdandarda taqyryptyq bannerler, bılbordtar ilindi. Aldyn-ala turǵyndardy habardar etý maqsatynda jergilikti BAQ-ta, áleýmettik jelilerde «Men– batyrdyń urpaǵymyn», «Otan qorǵaýshylar kúni» atty aıdarlar ashylyp, keń kólemdi aqparattandyrý jumystary júrgizildi.
Jeńis merekesine oraı «Syr óńiri Uly Otan soǵysy jyldarynda» atty vırtýaldy tarıhı-qujattyq kórme uıymdastyrylyp, Seıitmurat Embergenovtiń «Ana júregi» atty onlaın spektakli qoıylady.
Sondaı-aq «Syr Shańyraǵy» youtube kanalynda «Jeńiske rýh bergen ánder» atty patrıottyq ánder baıqaýy, «Maıdan dalasynda jazylǵan hattar Syr maqamynda» atty oblystyq jyrshy-termeshilerdiń konserti uıymdastyrylady.
Munan bólek, 16 maıdanger men tyl eńbekkerlerine merekelik quttyqtaý, qurmet kórsetý sharalary uıymdastyrylady.