Qazaly aýdanynda qaıyrymdy jandardyń kómegimen baspanaǵa muqtaj otbasylarǵa eki turǵyn úı salynyp jatyr. Bul týraly aýdan ákiminiń baspasóz qyzmeti habarlady.
Osydan birneshe kún buryn qazalylyq jas kásipkerler Marhabbat Asanova men Mereı Aıekeshova ózderiniń áleýmettik jelidegi paraqshalarynda Qazaly qalasy turǵynynyń baspanasy qulaý qaýpinde turǵanyn aıtyp, qaıyrymdy jandardy kómek kórsetýge shaqyrǵan bolatyn. Kórsetilgen esepshotqa túsken qarjyǵa turǵyn úıdiń irgetasy quıyldy. Az kúnde qabyrǵasy qalana bastaıdy. Bul ıgilikti iske Qazaly qalasynyń belsendi azamattary men jastary ózderiniń laıyqty úlesterin qosýda. Eriktiler balalaryn bir ózi tárbıelep otyrǵan bul azamattyń aýlasyn qorshap, temir qaqpa ornatyp jatyr.
Q.Pirimov aýyly turǵynynyń da baspanasy kóktemde jaýǵan tolassyz jańbyrdan keıin turýǵa jaramsyz bolyp qalǵan. Aýyldaǵylar Orysbaı men Kúnimkúl Naýhanbaevtarǵa úı salyp berýge ózderi kiristi. Qazir aýyl jastarynyń demeýshiligimen úıdiń irgetasy quıylyp, qabyrǵasy qalanyp tur.