Qurlyqtyq hokkeı lıgasynda (QHL) kúsh synasyp júrgen Novosibirdiń «Sıbır» klýbynyń qamqorshylyq keńesiniń jetekshisi Dmıtrıı Bosov keshe Máskeýdiń irgesindegi Ýsov kentinde ornalasqan záýlim úıinde óz-ózine qol jumsap, baqılyq boldy.
Aıtýly azamat 52 jasta edi. Ol Reseıdiń Barnaýl qalasynda dúnıege keldi. N.Baýman atyndaǵy Máskeý Memlekettik tehnıkalyq ýnıversıtetiniń radıoelektoronıka jáne lazerlik tehnıka fakýltetin qyzyl dıplommen aıaqtady. Eńbek jolyn «Transmash» zaýytynda bastaǵan ol keıinnen kóptegen laýazymdy qyzmetter atqardy.
Keıinnen Bosov bızneske bet burdy. Bul salada da kóptegen tabystarǵa qol jetkizdi. «Alltek» kompanııasyn quryp, sol kásiporynǵa jetekshilik etti. 2008 jyldan beri ol «Sıbır» klýbynyń qamqorshylyq keńesiniń jetekshisi qyzmetin atqaryp keldi. Bıyl Dmıtrıı Bosov Reseıdiń eń baı bıznesmenderi tiziminde 86 satyǵa jaıǵasty. Qazirgi kezde onyń baılyǵy 1,1 mıllıard dollardy qurap otyr.