Fýtboldan Ýels ulttyq quramasynyń juldyzy Garet Beıl bıyl Madrıdtiń «Realynan» ketýi múmkin.
Kezinde Anglııa Premer-lıgasynda «Tottenhemnyń» sapynda jasyndaı jarqyraǵan Beıl 2013 jyly «Realdyń» jeıdesin kıgen edi. Ol kezdegi jartylaı qorǵaýshynyń transferlik quny 100 mıllıon evrony qurady. Bul – rekordtyq kórsetkish edi! Alaıda alǵashynda táýir oınaǵan Garet sońǵy ýaqytta aıshyqty ónerimen kózge túspeı júr. Máselen, bıylǵy maýsymda 17 ret jasyl alańǵa shyqqan ol nebary eki gol soǵyp, eki ret qana nátıjeli pas berdi. Árıne, bul jaǵdaı koroldik klýb basshylary men bapkerlerin qanaǵattandyrmaǵany anyq. Endi olar Beıldi satýǵa daıyn.
Qazirgi kezde 30 jastaǵy fýtbolshyǵa «Nıýkasl» kóz tigip otyrǵan kórinedi. Eger qos tarap ortaq mámilege kelse, onda Garet Beıl qaıta Anglııaǵa oralýy múmkin.