Bul týraly kásipkerler palatasynyń dırektory Ǵalymbek Jaqsylyqov aıtty.
Tótenshe jaǵdaı kezinde kásipkerler úshin asa úlken máselelerdiń biri ǵımaratty jaldaý aqysy boldy. Karantın jaǵdaıynda jumysyn toqtatýǵa májbúr bolǵandardyń kóbi ony tóleı almaıtyn edi. Kásipti damytý úshin dep alǵan nesıeleri, 2 aıǵa jýyq ýaqyt jumyssyz otyrý aıtarlyqtaı qarjylyq qıyndyqtarǵa alyp keldi.
Bul másele kásipkerler palatasynyń nazarynan tys qalǵan joq.
- Jergilikti atqarýshy organmen birge ǵımarattaryn jalǵa berip otyrǵan kásipkerlermen kelissózder júrgizdik. Onyń barysynda oblys boıynsha kólemi 2000 sharshy metrden asatyn ǵımaraty bar otyzdan astam kásipker jalǵa alýshy 1823 bıznes ókiline jeńildik jasaıtynyn jetkizdi. Kelissózderdiń basy-qasynda bolǵan jergilikti atqarýshy organdarǵa da, ǵımarat ıelerine de aıtar alǵysymyz sheksiz,- deıdi palata dırektory.
Atap aıtqanda, 2 saýda úıi 127 kásipkerge 50 paıyz, 1 saýda úıi 57 kásip ıesine 30 paıyz, 12 saýda nysany 1372 bıznes ókiline 20 paıyz jaldaý aqysynan jeńildik jasaǵan.
Al Jańaqorǵan aýdanyndaǵy «Nur» bazary, «Nur-Asyl», «Arken» saýda úıleri, Qazaly aýdanynda «Mýsaev», «Oryn-Aı», «Arý-Ilııa» bazarlary men «Bereke», «Báıterek» saýda úıleri, Qyzylorda qalasyndaǵy «Sáýlet» bazary ıeleri tótenshe jaǵdaı ýaqytynda kásipkerlerdi 100 paıyz jeńildikten bosatty. Bul da bıznestiń áleýmettik jaýapkershiligin kórsetedi.
Kásipkerler palatasynyń mamandary óz kezeginde kásipkerlerge salyqtyq jeńildikter, nesıeni tóleý merzimin shegertý, ýaqytsha jalaqysy saqtalmaıtyn eńbek demalysyna jiberilgenderge áleýmettik tólem alý máselelerinde keńester berip, súıemeldeý jumystaryn júrgizdi.