Qyzylorda oblysy Aral aýdanyndaǵy Aqbaı aýyly alys-jaqynǵa qarbyz-qaýynymen tanymal eldimeken. Sońǵy jyldary aýylda alma baq ta paıda boldy. Aýdan ákimi Muhtar Orazbaev dıqandar aýylynda bolyp, sharýalarmen tildesip, eńbekqor jandardyń bastamalaryna bereke tiledi.
Segiz gektar aýmaqqa plenka astyna qaýyn-qarbyz ekken Jańabaı Jolmyrzaev bul ádis jańa ósip kele jatqan óskinderge jan beretinin aıtady. Aýdan ákimi bul bastamaǵa oń baǵasyn berip, tıimdi usynystardy qoldaýǵa ázir ekendigin bildirdi.
Aýdan basshysy osydan birneshe jyl buryn alma ósirýdi qolǵa alǵan jeke kásipker Sanat Nurmanovtyń alma baǵynda boldy. Kásipker 5 gektar jerge Golden Delıshes jáne Renet Sımırenko atty elıtalyq tuqymnan 3350 túp alma kóshetin egipti.
Aýdan basshysy aldaǵy ýaqytta alma óndirisin aqbaılyq brendke aınaldyrsaq degen usynys aıtty. Kerek kásipti qolǵa alǵan sharýaǵa sáttilik tilep, jergilikti ákimdik tarapynan qajetti qoldaý jasalatynyn jetkizdi.