Aqtóbe sekildi jyl saıyn ósip-órkendep kele jatqan qalanyń bir kemshin tusy bar. Bul tal-terekterdiń azdyǵy, barynyń ózi kókke boı sozyp óse almaýy. Aǵash – qalanyń ókpesi, onyń tynysyn keńeıtetin aǵzasy. Salystyrmaly túrde qarastyrǵanda Aqtóbe qalasynyń ekologııalyq jaǵdaıy tómen desek shyndyqtan alshaq ketpeımiz.
Munda óndiristik kásiporyndardan shyǵatyn zııandy qaldyqtar qalanyń tynysyn tarylta túsýde. Al aǵash ósirý oblys ortalyǵynda kúrdeli kúıinde qalyp keledi.
Árıne bul turǵyda jasalǵan jospar da, tipti yqylas pen nıet te bar. Ony joqqa shyǵarý qıyn-aq. Soǵan qaramastan qalany jasyl jelekke oraý jónindegi máseleler tıisti nátıje bere almaı júr. Onyń basty sebebi – kógaldandyrý jumystarynyń qyry men syryn jetik biletin kásibı mamandardyń jetkiliksizdigi jáne osy másele boıynsha kelisimshart jasalǵan mekeme-kásiporyn ujymdary jaýapkershiliginiń tómendigi desek bolady.
Búgingi kúnge deıin jergilikti atqarýshy organdardyń atalǵan kásiporyndarmen jasaǵan kelisimsharttarynyń merzimi tek bir jylǵa eseptelip kelgeni málim. Bul qysqa kezeń tájirıbede ózin ózi aqtaı almaı, onyń ýaqytyn úsh jylǵa deıin uzartý jóninde sheshim qabyldanǵan. Bul ózgeris tal-terekterdi sýaratyn ári ony kútip-baptaıtyn kásiporyndardyń is-qımyldaryn shırata alsa jaqsy! Al bulaı bolmasa she?
Aqtóbe qalasynda egilgen taldar men kóshetterdiń tamyry tez sýalýynyń taǵy bir sebebi – ony sýarý isindegi ala-qulalyqtar. Bul jaǵdaı oǵan ylǵal men sýdyń jetispeýine ákelip soqtyrǵan edi. Osy olqylyq pen ústirttikti joıý úshin sońǵy kezderi Aqtóbe qalasynda tamshylatyp sýarý ádisteri paıdalanyla bastady. Bul tásil sýdy únemdep jumsaýǵa oń áserin tıgizbek. Atalǵan isti atqarý úshin buǵan qala bıýdjetinen arnaıy qarajat ta bólingen eken. Ári bul baǵyttaǵy jumystardy júrgizetin merdiger mekemeler de anyqtalypty.
Jón-aq. Mine, bıylǵy kóktemniń sońǵy aıy, mamyr da aıaqtalyp, jaz mezgili de jaqyndap keledi. Soǵan qaramastan joǵaryda aıtylǵandaı, kelisimshart jasalǵan mekemelerdiń qarqyndy is-qımyldary baıqala bermeıtini ókinishti-aq. Bul baǵytta bir sylbyrlyq pen enjarlyq bar ekeni aıqyn. Bul tujyrymymyzdyń basty mysaly birqatar saıabaqqa egilgen tal-terekterdiń kútimsiz turǵany. Onyń belgili bir bóliginiń jaz shyqpaı jatyp qýraı bastaǵany deýge bolady. Mundaı kórinis ásirese qaladaǵy «Orynbor» saıabaǵynda kóp kezdesetinin qala turǵyndary qynjyla aıtyp júr. Bul másele jergilikti telearnada tikeleı ótkizilgen efırde Aqtóbe qalasynyń ákimi Ashat Shaharovqa da qoıyldy.
– Qala kósheleri men saıabaqtarda egilgin tal-terekterdi sýarý jóninde turǵyndardy alańdatyp júrgen másele oryndy dep sanaımyz. Osyǵan baılanysty bul kórinis sý resýrstarynyń jetkiliksizdiginen, ony tasymaldap jetkizý isinde birqatar kemshilikterdiń oryn alýy saldarynan ekenin aıtqym keledi. Qazirgi kezde qalada tez sheshimin tabýdy qajet etetin on saıabaqtyń tizimi jasaldy. Onyń ishinde «Orynbor» saıabaǵy da bar. Sondyqtan bul másele aldaǵy ýaqytta tikeleı baqylaýymyzda bolmaq, – dep jaýap qatty qala ákimi.
Ýáde – qudaı sózi. Sońǵy kezde Aqtóbeni jasyl qalaǵa aınaldyrý jónindegi jobalar tıisti nátıjesin berse ıgi.
AQTО́BE