Karantın rejımine baılanysty azamattardy jeke suraqtary boıynsha qabyldaý onlaın formatta ótti. Bul týraly Aýyl sharýashylyǵy mınıstrliginiń baspasóz qyzmeti habarlady.
Qabyldaýǵa Aqmola, Aqtóbe, Almaty, Shyǵys Qazaqstan, Batys Qazaqstan, Mańǵystaý jáne Túrkistan oblystarynyń, sondaı-aq Nur Sultan men Almaty qalalarynyń turǵyndary jazylǵan. Mınıstrge qoıylǵan saýaldardyń basym kópshiligi orta jáne shaǵyn aýyl bıznesine jeńildetilgen nesıeler men sýbsıdııalar berý týrasynda boldy. Azamattarǵa mal ósirýdi qoldaý, sút fermalaryn qurý jáne et óńdeý boıynsha iske asyp jatqan baǵdarlamalar men olardyń sharttary egjeı-tegjeıli túsindirildi.
Fermerler tarapynan suraqtarmen qatar shaǵymdar da aıtyldy. Máselen, Semeı qalasyndaǵy «Aq nan» JShS-niń satyp alý jónindegi menedjeri Darhan Tólepbergen, mınıstrden astyq pen kúnbaǵys tuqymdarynyń eksportyna shekteýler qashan alynyp tastalatynyn surady.
Sh.Ýálıhanov atyndaǵy Kókshetaý memlekettik ýnıversıtetiniń agrarlyq-ekonomıkalyq ınstıtýtynyń professory Jumabaı Alenov, Mınıstrlik stýdentterge aýylsharýashylyq mamandyqtary boıynsha oqý granttaryn qashan bóle bastaıdy jáne mınıstrliktiń aýylsharýashylyq ǵalymdaryna qandaı kómek kórsetetini týraly surady. Sonymen qatar professor agrarlyq sektorda jumys istegisi kelmeıtin stýdentterge memlekettik grant bólýdiń tıimsiz ekenin tilge tıek etti. О́z tájirıbesinen mysal keltirip, búginde 100 túlektiń tek 10-y ǵana agrarlyq salada jumys isteıtinin ashyq aıtty.
Odan keıin mınıstrge aqtaýlyq zeınet demalysyndaǵy agronom Kenjebek Sarıev suraq qoıdy. Ol «QazAgro» qarjy ınstıtýty kepilge múlik talap etip, nesıe bermeı, al ýákiletti uıymdar 127 mıllıon teńge turatyn jylyjaı keshenin berýden bas tartyp otyrǵanyna shaǵymdandy. Agronomnyń aıtýynsha, nysan ıeleri ony nashar kúıge jetkizgen. Qazir jylyjaılar jumys istemeı qaldy dedi. Kenjebek Sarıev qazirgi jylyjaı ıeleri olardy Kókshetaýdan qashyqtan basqarady deıdi. Bul jaǵdaı sharýashylyqtyń quldyraýyna sebep bolýy múmkin. Zeınetker isti óz qolyna alǵysy keletinin, ol jylyjaı sharýashylyǵyn ózgelerden artyq júrgize alatynyn sóz etti. Zeınetkerdiń aıtýynsha, onyń máselesi qalaı sheshilse de, kez-kelgen jaǵdaıda, aýylsharýashylyq nysandaryn jergilikti turǵyndarǵa berý kerek, al basqa aımaqtardyń turǵyndaryna ruqsat bererde óte muqııat bolý kerek.
Túrkistan oblysynan suraq qoıǵan kópbalaly ananyń da saýaly tyńdaldy. Ol qyryqqabat ósiretin fermerlerge endi qandaı qoldaý bolatynyn surady.
Barlyq suraqtarǵa Aýyl sharýashylyǵy mınıstri Saparhan Omarov jan-jaqty jaýap berdi. Qandaı da bir túıtkildi másele týyndaǵan jaǵdaıda usynystar men suraqtardy jazbasha joldaýǵa bolatynyn, ony óz baqylaýyna alatynyn aıtty.