Búgin Jambyl oblysynda Halyqaralyq balalardy qorǵaý kúnine oraı úsh birdeı ámbebap sport jáne oıyn alańy el ıgiligine berildi. Balalar merekesi qarsańynda jańa nysandar Baızaq aýdanynyń Sarykemer aýylynda, Qordaı aýdanynyń Masanshy aýylynda jáne Taraz qalasyndaǵy Qarataý-2 shaǵyn aýdanynda ashylyp otyr.
Atalǵan sport alańdarynyń jobasyn «Samruk-Kazyna Trust» áleýmettik jobalardy damytý Qory Jambyl oblysynyń ákimdigimen birlesip júzege asyrǵan. Jańa sporttyq jáne oıyn keshenderi 30 kórermenge arnalǵan jasandy kógaly bar fýtbol, «workout» jáne balalarǵa arnalǵan qum-tóbeshik, átkenshegi bar oıyn alańdarymen qamtylǵan. Alańnyń perımetri boıynsha qoqys salatyn oryndyqtar men ýrnalar ornatylǵan. Mundaı bir keshenniń aýmaǵy 1300 sharshy metrdi quraıdy.
Al, Taraz qalasyndaǵy alańnyń ashylý saltanatyna Jambyl oblysynyń ákimi Berdibek Saparbaev arnaıy qatysty. «Memleket basshysy elimizde barlyq jastaǵy azamattar arasynda buqaralyq sportty damytýdy tapsyrdy. Ol úshin halyqqa sporttyq ınfraqurylymnyń qoljetimdiligin qamtamasyz etý qajet. Búginde bizdiń oblysta sportpen belsendi aınalysý úshin barlyq jaǵdaı jasalǵan. Aǵymdaǵy jyly sport nysandarynyń ınfraqurylymyn jańartý boıynsha 120 joba júzege asyrylýda. Balalardyń sportqa degen súıispenshiligin arttyrý arqyly biz olardy jaǵymsyz ádetterden saqtaı alamyz. Deni saý balalar – bizdiń bolashaǵymyz!», dedi Berdibek Saparbaev.
Paıdalanýǵa berilip otyrǵan jańa nysandardy salý oryndaryn Jambyl oblysynyń ákimdigi jáne «Samruk-Kazyna Trust» qory jergilikti azamattyq qoǵammen birlesip anyqtaǵan. Jambyl oblysynyń ákimdigi tıisti aýmaqty usynsa, «Samruk-Kazyna Trust» qory alańdardyń tolyq ornatylýyn qamtamasyz etken. Endi olardyń kútip ustalýy men qyzmetin qamtamasyz etý úshin nysandar jergilikti atqarýshy organdardyń teńgerimine beriledi.
«Bul alańdar balalarǵa da, eresekterge de qoljetimdi, olarǵa kirý tegin. Nysandar salaýatty ómir saltyn qoldaý jáne balalar sportyn damytý, qalalar men aýdandardyń turǵyndaryn zamanaýı sporttyq ınfraqurylymmen qamtamasyz etý maqsatynda salyndy», dedi «Samruk-Kazyna Trust» qorynyń resmı ókili Mıras Irgebaev.
Jergilikti ákimdik pen joba uıymdastyrýshylary turǵyndardy alańdarǵa uqypty qaraýǵa, qurylymdardy buzbaýǵa jáne aýmaqty qoqysqa toltyrmaýǵa shaqyrady. Atalǵan ámbebap alańdardy ornatý jobasyn «Samruk-Kazyna Trust» qory «Meniń elim» áleýmettik ınvestısııalar baǵdarlamasy aıasynda júzege asyrýda. «Meniń elim» baǵdarlamasynyń jobalary áleýmettik ınfraqurylymdy damytýǵa jáne óńirlerdegi turǵyndardyń ómir súrý sapasyn arttyrýǵa baǵyttalǵan. Joba iske qosylǵan sátten bastap búkil el boıynsha 130-dan astam ámbebap sport jáne oıyn alańdary ashyldy.
Jambyl oblysy