Osyǵan qatysty sarapshylardyń da pikiri qyryq qubyla bastady. Keshegi pikir Ulttyq bankte dollardyń massasy kóbeıip ketti, suranys joq dese búgingi pikir odan saıyn salmaqty. Sarapshylar munaı, shıkizat baǵasynan mán kete bastaǵan tusta arzan dollar biz úshin qýana qoıatyndaı jaǵdaı emes ekenin aıtyp jatyr. Sebebi arzan dollar ımport baǵasyn turaqtandyrǵanmen, arzandaýyna áser ete almaıtyny belgili bolyp qaldy.
Uzaq jyldar boıy Ulttyq bankte birneshe tóraǵanyń keńesshisi bolǵan qarjyger Ilııas Isaev AQSh dollaryna áser etip otyrǵan faktor retinde geosaıası jaǵdaılardy aıtady. Qytaı men AQSh arasy shıenelisip barady. Odan bólek AQSh-tyń ishki jaǵdaıy da máz emes. Kóptegen elder halyqaralyq saýda aınalymynda AQSh dollarynan bas tartyp, ulttyq valıýtasyn qoldana bastady: EAEO elderi de óz ara saýda aınalymynda ulttyq valıýtalaryna basymdyq berýge nıet tanytyp júr. «Aldaǵy jarty jyldyqta dollarǵa suranysqa sebep bolatyn faktor kórip turǵan joqpyn. AQSh dollary men teńge dálizi 1 AQSh dollary 400-420 teńge dálizinde bolady.Bul bizge eki jaqty áser etip jatyr. AQSh dollarymen baǵalanyp keletin ımport baǵasy qymbattamaıdy. Al keri áseri shıkizat, munaı eksporty úshin AQSh dollaryn tólem quraly retinde paıdalanymyz. Munaı baǵasynan qun kete bastaǵan ýaqytta bul biz úshin asa tıimdi baǵa emes» deıdi Ilııas Isaev.
Qazaqstan qor bırjasyndaǵy tańerteńgilik saýda-sattyq qorytyndysy boıynsha dollardyń baǵasy shamamen 6 teńgege arzandady. Bul aqparatty keshkisin Qazaqstan Qor bırjasynyń resmı saıty habarlady.
2 maýsymda ótken tańerteńgilik saýda-sattyq nátıjesinde amerıkalyq valıýta arzandady – onyń baǵasy birden 5,7 teńgege tómendedi.
Resmı valıýta baǵamyna sáıkes, qazir 1 dollar 402,7 teńgege baǵalanýda. Qazaqstan qalalaryndaǵy aqsha aıyrbastaý núkteleri sońǵy saýda-sattyq nátıjelerine baılanysty sheteldik valıýta baǵasyn jańartty.
Almatynyń aqsha aıyrbastaý núktelerinde dollardy 402,8-406 teńgeden satyp alýǵa bolady. Almatyda dollardyń ortasha baǵasy 403,9 teńgeden satylyp jatyr.