Jadyra Ámirhanova kıim dızaıny salasyna nebári eki jyl buryn ǵana keldi. Stýdent shaǵynda ulttyq kıim dızaınerleriniń jańa úlgileri kópshilikke kórsetetin sánger bop eńbek etken. Mamandyǵy ekonomıst bolsa da, bala kezinen anasynan kórgenin kókiregine túıip ósken boıjetkenniń ózine beımálim qyry otaý quryp, kishkentaıy ómirge kelgende belgili boldy. Bala kútimimen úıde otyrǵan soń tiginshilikti qolǵa ala bastady. Aldymen shaǵyn tigin sheberhanasyn ashyp, kúndelikti kıetin kóılekter tigýge kirisedi. Sonan soń qolǵa alǵan isin «Aisha bibi» dızaınerlik kıim salony retinde keńeıtti. Bul ataýdy qazaqy, qulaqqa jaǵymdy, júrekke jyly tıgen soń tańdap qoıǵan. Qazir onda 7 adamdy turaqty jumyspen qamtyp otyr.
Dızaınerlik kıim tigetin sheberhanada tapsyrys ta tolastaǵan emes. Aıyna shamamen 20 dızaınerlik kóılek, 25-30 dana beshpent, kájekeı, qamzol tigip keledi. Qazaqsha kıimdermen qatar zamanaýı, sándi kıimder de úılesimin taýyp erekshe stılde tigilýde. Toptamalar sheberhanadan bólek kıim dúkenderinde saýdalanyp jatyr.
Jadyraǵa ıdeıa men shabyt tosynnan keledi eken. Kóbine shetelderge saparlarǵa shyqqanda, keıde, tipti áleýmettik jelilerdi aqtarǵanda teńdessiz oılar kelip, dızaındardy úılestirý qabileti sharyqtaı túsedi.
Dızaınerlik kıimderdiń matalary da kóp kezdese bermeıtin, erekshe tańdaýmen ákelinedi. Matalar men tiginge qajetti bólshekter Dýbaı men Túrkııadan tasymaldanady. Baǵaly matalar men tyń ıdeıanyń qosylýynan qaıtalanbas, aıryqsha kıimder tigiledi.
– Dızaınerlik kıimderdiń ereksheligi – kóshirme bolmaýy tıis. Bireýdiń saǵan deıin tikken kıiminiń modelin «urlap» shyǵara almaısyń. Jan-jaqty izdenistiń, tolyqqandy ıdeıalardyń jemisi – jańa týyndy bolyp shyǵady. Bireýdiń oıyn aına qatesiz qaıtalaýdy túsinbeımin. Ár adam óz dızaındyq sheberligimen, óz stıli, óz ereksheligimen tanylýy kerek, – deıdi Jadyra Ámirhanova.
Adal eńbek, tókken ter aqtalmaýy múmkin emes. Jadyranyń jumystary da úlken ortada jaqsy baǵalanyp júr. Nur-Sultan qalasynda ótken «ALTYN OIMAQ» kórme-baıqaýyna dızaınerlik kıimderi qoıyldy. Sonan soń Qyzylorda qalasynda ótken «Sán men sahna» baıqaýyna qatysyp, bas júldeni qanjyǵasyna baılap keldi. Jadyranyń ıdeıasymen tigilgen ulttyq kıimder, túıe júnimen syrylyp salynǵan jadaǵaılar, qazaqy naqyshtaǵy aıaq kıimder kópshilikti tánti etti. Úlken qoshemet pen marapatqa bólenip keldi. Mundaı qýanyshtar dızaınerdiń shabytyna shabyt qosyp, dızaınerlik sheberhanany sán úıine aınaldyrý týraly oı keldi. Qazir sán úıiniń ǵımaraty daıyn. Adam sanyn 15-ke deıin kóbeıtip, kúzge qaraı ashýdy josparlap otyr. Úlken sán úıi kúndelikti stıldi kıimder men sporttyq úlgidegi kostıýmder tigýdi qolǵa alýdy kózdep otyr.
Mańǵystaý oblysy