4 maýsym kúni Qazaqstan Respýblıkasynyń Tuńǵysh Prezıdenti – Elbasy kitaphanasynda QR Memlekettik rámizder kúnine arnalǵan «Úmitin eldiń arqalap, armannan týǵan rámizder» atty onlaın formatta dóńgelek ústel ótti. Bul týraly «Qazaqstan Respýblıkasynyń Tuńǵysh Prezıdenti – Elbasynyń kitaphanasy» baspasóz qyzmeti habarlady.
Is-sharaǵa qatysqan jastar uıymdarynyń kóshbasshylary, óner qaıratkerleri, «Qazaqstannyń 100 jańa esimi» jobasynyń jeńimpazdary, Qazaqstannyń joǵary oqý oryndary men kolledjderiniń oqytýshylary men stýdentteri, pedagogıkalyq qoǵamdastyq ókilderi memlekettik rámizderdiń mańyzdylyǵyn qazaqstandyq patrıotızm men ulttyq biregeılikti jasaqtaýdyń negizgi quramdas bóligi retinde talqylady.
Dóńgelek ústeldi Elbasy kitaphanasynyń dırektory, saıası ǵylymdar doktory, professor Ámirhan Rahymjanov júrgizdi. Ol qatysýshylardy Qazaqstan Respýblıkasynyń Memlekettik rámizder kúnimen quttyqtaı kele, bul merekeniń táýelsiz Qazaqstan tarıhynda erekshe oryn alatyndyǵyn, shynaıy egemendiktiń qalyptasýyndaǵy mańyzdy kezeń ekendigin atap ótti.
– Memlekettik rámizder - Qazaqstan Respýblıkasynyń derbestigi men táýelsizdigin búkil álemge pash etken, ári memleketimizdiń ótkeni men búgini jáne bolashaǵy arasyndaǵy sabaqtastyqtyń jarqyn kórinisi. «…Biz táýelsizdikti ańsap, zaryǵyp jettik. Endi sol táýelsizdiktiń qasıetti belgilerin de erekshe qadirleýimiz kerek. Árbir azamat Memlekettik Týdy, Memlekettik Eltańbany, Memlekettik Gımndi sheksiz súıispenshilikpen qasıet tutýy tıis. Eldigimizdiń synalatyn bir tusy osy» – degen Elbasy sózderi Máńgilik Eldiń máńgilik boıtumar-belgilerin jelbirete sharyqtatyp, berik qabyrǵadaı eńseletip jáne asqaqtata áýendetýimizdi amanattaıdy. Osy oraıda Qazaqstan Respýblıkasynyń Tuńǵysh Prezıdenti – Elbasy N.Á. Nazarbaevtyń jańa memlekettik rámizderdi qabyldaýǵa qanshalyqty zor mán bergendigin aıta ketken jón. Sol tusta jas egemendi memlekettiń saıası máni men maqsatyn naqtyly túrde kórsetetin kórkemdik sheshim tabý qajet boldy. Halyq saılaǵan qalaýlylar óz oılaryn búkpesiz bildirip, óz pikirleri men kózqarastaryn batyl qorǵaı otyryp, ortaq kelisimge negizdelgen sheshimderdiń qabyldanýyna aıtarlyqtaı úles qosty. Elbasy tuńǵysh táýelsizdik rámizderiniń tól tarıhı tamyry tereńnen boı tartýyn, ulttyq bolmysy anyq ta aıshyqty bolýyn qadaǵalady. Memlekettik rámizder – halqymyzdyń muqalmas rýhyn, qaharmandyǵy men danalyǵyn, asqaq arman-tilegin jetkizetin qundy belgileri bolyp tabylady. Ultaralyq tatýlyq pen beıbitshilikti nasıhattaý jolynda jáne memleketimizdiń álemdik deńgeıde tanylyp ózine tán belgilerimen damyǵan elder qatarynan oryn alýy úshin tól rámizderimizdiń atqaratyn qyzmeti aıryqsha. Elimizde tynyshtyq, beıbitshilik bolsyn! Azat eldiń Ánuranyn jelbiregen kók Týdyń astynda máńgi shyrqaýǵa jazsyn! – dep atap ótti Á.Rahymjanov.
Álemge tanymal ánshi, kompozıtor jáne kóp aspap mamany, Qazaqstannyń eńbek sińirgen qaıratkeri Dımash Qudaıbergen dóńgelek ústel qatysýshylary men barsha qazaqstandyqtarǵa óziniń beıne quttyqtaýyn joldady:
– Qurmetti otandastar! Sizderdi Qazaqstan Respýblıkasynyń Memlekettik rámizder kúnimen shyn júrekten quttyqtaımyn! Elimiz ben halqymyzǵa beıbitshilik pen órkendeý tileımin. Otanymyz bar maqsatyna jetip, gúldene bersin. Bar asyl armandarymyz oryndalyp, elimiz árdaıym bıikte bolsyn!
Qazaqstan jastary Kongresiniń atqarýshy dırektory Toqtar Bolysov memlekettik rámizderdiń jastar úshin mańyzdylyǵyna arnalǵan sózinde Memlekettik rámizder kúnin merekeleýdiń basty ıdeıasy - jastar patrıotızmi men barlyq etnostardyń birligin nyǵaıtý, táýelsiz eldiń qundylyqtary men jetistikterin nasıhattaý ekenin atap ótti.
Qazaqstan halqy Assambleıasynyń «Jańǵyrý joly» respýblıkalyq jastar qozǵalysynyń, Respýblıkalyq «Jarasym» jastar uıymynyń tóraǵasy Tımýr Jumyrbaevtyń pikirinshe memlekettik rámizder qoǵamdyq kelisim men jalpyulttyq birliktiń mańyzdy quramdas bóligi sanalady. Ol «kez kelgen etnos ókili úshin Qazaqstannyń memlekettik rámizderi maqtanysh pen qurmettiń kórinisi bola bermek», - dep atap ótti.
«Ulan-ǵaıyr dala eli» qoǵamdyq birlestiginiń tóraǵasy, Qazaqstan Respýblıkasynyń Prezıdenti janyndaǵy Jastar saıasaty jónindegi keńes múshesi Ýálıhan Bahretdınov «Jastar tárbıesindegi Qazaqstan Respýblıkasynyń memlekettik rámizderiniń róli» taqyrybynda, №54 mektep-lıseıiniń dırektory, «Qazaqstannyń 100 jańa esimi» jobasynyń jeńimpazy Shákárim Seısenbaı «Ulttyq qundylyqtarǵa negizdelgen tárbıe» taqyrybynda baıandama jasady. «Jastar» teatrynyń akteri, «Altyn jebe» volonterler uıymynyń negizin qalaýshylardyń biri, «Qazaqstannyń 100 jańa esimi» jobasynyń jeńimpazy Álibek Nurbek «Memlekettik kók baıraq álem sahnasynda» baıandamasymen sóz alsa, L.N.Gýmılev atyndaǵy Eýrazııa ulttyq ýnıversıtetiniń 2 kýrs stýdenti, Elbasy kitaphanasynyń volonteri Ánýar Jumabektiń baıandamasynyń taqyryby «Memlekettik rámizder – jastardyń patrıottyq tárbıeleýdiń biriktirýshilik bastaýy» boldy.
Sondaı-aq, dóńgelek ústelge beınebaılanys arqyly Aýǵanstannan kelip, Qazaq ulttyq agrarlyq ýnıversıtetinde (Almaty q.) oqyp jatqan magıstranttar qatysty.