Almatynyń memlekettik bas sanıtarlyq dárigeri Jandarbek Bekshınniń tapsyrmasy boıynsha adamdar kóp jınalatyn oryndar men qoǵamdyq keńistikterdi dezınfeksııalaý kúsheıtildi.
Erteńnen bastap qalanyń barlyq qoǵamdyq oryndaryna aýqymdy dezınfeksııalaý jumystaryn júrgizýdiń jańa kezeńi bastalmaq. Eń aldymen jurt kóp jınalatyn alańdar, kósheler men parkter, skverler, jaıaý júrginshi aımaqtary zalalsyzdandyrylady. Osylaısha, Almaty qalasy Turǵyn úı saıasaty basqarmasynyń málimeti boıynsha dezınfeksııa jasaý úshin qala ortalyǵy shekteledi.
Qaýipsizdik sharalary júrgiziletindikten Almatynyń Turǵyn úı saıasaty basqarmasy qala turǵyndarynan dezınfektorlar men arnaıy avtokóliktiń jumystaryna kedergi keltirmeý úshin adamdar kóp jınalatyn jerlerden aýlaq bolýdy suraıdy.
Almatyda karantın rejımi engizilgen kezden bastap qalanyń memlekettik bas sanıtarlyq dárigeriniń tapsyrmasy boıynsha qala turǵyndary arasynda koronavırýs ınfeksııasynyń taralmaýy úshin dezınfeksııa jumystary barynsha júıeli júrgizilip keledi.
«Karantın rejıminiń báseńdeýine oraı koronavırýs ınfeksııasyn juqtyrǵandar sanynyń artqany baıqalady. О́ıtkeni, qalalyqtar qoǵamdyq oryndar – alańdarǵa, jaıaý júúrginshi aımaqtaryna, parkter men skverlerge jappaı barýda. Onyń ústine sanıtarlyq qaýipsizdik erejeleri saqtalmaýda, maska taǵylmaýda, áleýmettik qashyqtyq saqtalmaýda. Adamdar kóp jınalatyn oryndar óte qaýipti, sebebi vırýs túrli zattardyń, oryndardyń betterinde ornyǵyp qalady», - dep atap ótti Almatynyń Turǵyn úı saıasaty basqarmasyndaǵylar.
Dezınfeksııa jasaý úshin qoldanylatyndar qaýpi tómen 4-shi synypty zattar qataryna jatqanymen, 5 saǵat úıden shyqpaý jáne óńdelgen oryndarǵa barmaý talap etiledi. Jeke qaýipsizdikti ári jaqyn jandardyń, ásirese balalardyń jáne qart adamdardyń densaýlyǵyn saqtaý maqsatynda mundaı oryndarǵa dezınfeksııa jasalǵanǵa deıin jáne odan keıin de barmaýdy suraımyz.
Qoǵamdyq keńistikterdi óńdeý jumystaryna 1200 jumysshy jáne 135 arnaıy tehnıka birligi tartyldy.
Anyqtama úshin: Qalada karantın rejımi engizilgeli beri dezınfeksııalaý jumystary júıeli túrde myna baǵyttar boıynsha júrýde:
Turyn úı saıasatynyń merdigerlik uıymdary kópqabatty turǵyn úılerdiń 24 myń kireberisteri 4 myńnan astam aýlalaryna aptasyna 2 ret dezınfeksııa júrgizedi. Jeksenbiden basqa kúnderi kópqabatty úılerge 65 brıgada quramyndaǵy 450-ge jýyq dezınfektorlar óńdeý jumystaryn júrgizedi.
Kún saıyn shamamen 75 myń lıtr daıyn eritindi paıdalanylady jalpy qazirdiń ózinde 4,3 mln lıtrden astam daıyn eritindi qoldanyldy.
Erteń dezınfeksııalyq óńdeýdiń 21 kezeńi aıaqtalady. Bul jumys odan ári jalǵasatyn bolady.
Oshaqty kireberister de kún saıyn óńdeledi, ony ár aýdanda jeke bólingen árqaısysy 3 adamnan júrgizedi.
Kommýnaldyq qyzmetterdiń kúshimen aıaldamalar, ýrnalar, oryndyqtar, jer asty jáne jer ústi ótpeli joldar, medısına mekemeleriniń jáne basqalarynyń aınalasy óńdeledi. Bulardan ózge, 85 dezınfektor kún saıyn konteınerli alańdardy óńdeıdi.
Kestege saı konteıner alańdary kezeńmen zalalsyzdandyrylady.
Qoǵamdyq keńistikter dezınfeksııalyq óńdeýden ótýde. Jalpy, TJ rejımi bastalǵan kezden beri 27 mln 250 myń daıyn dezınfeksııalyq eritindi qoldanyldy, skverlerdi, parkterdi, jaıaý júrginshi aımaqtary men basqa oryndardy óńdeý úshin kúnine orta eseppen 500 myń lıtr eritindi jumsaldy.