Kenshiler astanasynda turatyn aty ańyzǵa aınalǵan tálimger, KSRO-nyń jáne Qazaqstannyń eńbek sińirgen jattyqtyrýshysy Leonıd Rahymjanuly Tileýbaev 70 jasqa toldy. Karantın shektemegende bokstyń jiligin shaǵyp, maıyn ishken maıtalman mamannyń mereıtoıy keńinen atalyp óter edi...
Degenmen, jetpis jastyń jelkenin kergen jattyqtyrýshyǵa sanıtarlyq-epıdemıologııalyq tártiptiń jaǵdaıynda shynaıy qurmettiń ısharaty jasaldy. Qaraǵandy oblystyq dene shynyqtyrý jáne sport basqarmasynyń basshysy Temirhan Abylaev mereıtoı ıesine "Qurmetti sport qaıratkeri" tósbelgisin, sondaı-aq, Mádenıet jáne sport mınıstrligi Sport jáne dene shynyqtyrý komıtetiniń, oblystyq jáne qalalyq máslıhattardyń, Qaraǵandy qalasy ákimdiginiń, oblystyq dene shynyqtyrý jáne sport basqarmasynyń "Alǵys hattaryn" tabys etti.
– Men baqyttymyn! Shynymdy aıtsam, bul jetpis jas degen qas qaǵymdaı ýaqytta óte shyqty. Men áli kúnge deıin qatardan qalmaǵanyma qýanyshtymyn! – dep tebirendi mereıtoı ıesi.
Jasynyń jetpiske kelgenine qaramastan, Leonıd Rahymjanuly áli kúnge deıin balalardy jattyqtyrady. Qazirgi ýaqytta "Bokstan oblystyq mamandandyrylǵan balalar men jasóspirimderdiń olımpııalyq mektebi" mekemesinde eńbek etetin ardager bapkerdiń qaramaǵynda qyryqqa jýyq bala bokstyń qyr-syryn úırenip júr.
Leonıd Tileýbaev 44 jyl bapkerlik etken ǵumyrynda talaı chempıondardyń tusaýyn kesip, tomaǵasyn sypyrǵan. Olardyń qatarynda Qaraǵandy boks mektebiniń dańqyn kúlli álemge pash etken Serik Nurqazov, Beıbit Esjanov, Dýlat Boranqulov syndy saıypqyrandardyń esimin erekshe ataýǵa bolady.