AQSh-tyń Las-Vegas qalasyndaǵy MGM Grand arenasynda kásipqoı boks keshi ótti. Bul – pandemııaǵa baılanysty úsh aıǵa sozylǵan úzilisten keıin alǵash ret uıymdastyrylǵan dúbirli doda.
Úlken boksty jankúıerler de ábden saǵynyp qalǵan eken. Las-Vegastaǵy jekpe-jekterdi jer jahandaǵy san mıllıon kórermen teledıdar arqyly tapjylmaı tamashalady. Osy keshtiń basty básekesinde ekinshi jartylaı jeńil salmaqtaǵy amerıkalyq Shakýr Stıvenson men Pýerto-Rıkonyń ókili Felıks Karabaıo kúsh synasty.
2016 jyly Rıo Olımpıadasynda kúmis medaldi moınyna ilgen Nıý-Djersı shtatynyń Nıýark qalasynyń týmasy kásipqoılar arasyndaǵy óz karerasyn 2017 jyldyń kókteminde bastady. Sol kezden beri Stıvenson 13 kezdesýdiń barlyǵyn jeńispen aıaqtady. 7 qarsylasyn nokaýtpen utty. Qazirgi kezde ol WBO nusqasy boıynsha álem chempıony atanyp otyr. Qarsylasy 26 jasta. Karabaıo 16 ret rıngke kóterilip, 13 márte jeńiske jetti. 9 básekede aıqyn basymdyq tanytty. 1 ret utylyp, eki kezdesýde teń esep tirkeldi.
Qos myqty arasyndaǵy saıysta Shakýr Stıvensonnyń ústemdigi esh kúmán týǵyzǵan joq. Básekeniń basynan aıaǵyna deıin tizgindi bermegen AQSh boksshysy altynshy raýndta Felıks Karabaıony eki márte búıirden ońdarmaı uryp, nokaýtqa jiberdi.