Tańǵajaıyp talant ıesi, orystyń keremet aktrısasy Inna Chýrıkova búgin, 5 qazan kúni 70 jasqa toldy. Bul týraly «Izvestııa» gazeti jazdy.
KSRO halyq ártisi jáne «myńdaǵan júzderdiń jeńimpazy» óz ómirindegi osynaý úlken belesti óziniń súıikti «Lenkom» teatrynyń sahnasynda atap ótti. Ol muny «Akvıtan jolbarysy» spektaklindegi Alıenora Akvıtanskaıanyń rólin somdaýmen oryndady. Bul spektakl budan úsh jyl buryn aktrısanyń kúıeýi, belgili kınorejısser Gleb Panfılovtyń basshylyǵymen birinshi ret qoıylǵan bolatyn.
Qoıylymnan keıin mereıtoı ıesin jaqyn týystary men áriptesteri quttyqtady.
Inna Chýrıkova – «Otanǵa sińirgen eńbegi úshin» ordeniniń 3 jáne 4 dárejelerimen, Uly Petr ordeniniń 1 dárejesimen, Stanıslavskıı atyndaǵy halyqaralyq syılyqpen jáne «Hrýstal Týrandot» júldesimen marapattalǵan. Ol – RSFSR-diń kıno óneri salasyndaǵy jáne ádebıet pen óner salasyndaǵy eki dúrkin memlekettik syılyǵynyń laýreaty, «Nıka», «Trıýmf», TEFI, «Altyn qyran», «Kýmır» jáne basqa syılyqtardyń ıegeri.
Murat Aıtqoja.
Sýrette: Inna Chýrıkova «Akvıtan jolbarysy» spektaklindegi Alıenora Akvıtanskaıanyń rólinde.