Qazir ǵana Máskeýdegi «Olımpııskıı» sport kesheninde aýyr salmaqtaǵy boksshylar reseılik Aleksandr Povetkın men ýkraınalyq Vladımır Klıchkonyń arasyndaǵy álem chempıondyǵy úshin jekpe-jek bastaldy.
Reseıdiń «Birinshi arnasynan» kórsetilip jatqan habar bir mezgilde álemniń 20 eline taraýda.
Vladımır Klıchko Semeı jerinde týǵan. Keıin, Volodıanyń áli bala shaǵynda áskerı qyzmettegi ákesi Ýkraınaǵa qyzmetke aýysqan.
Bul urystyń jalpy júlde qory 26 mln. dollar bolyp otyr.
37 jastaǵy Vladımır Klıchko WBA (Búkilálemdik boks qaýymdastyǵy) nusqasy boıynsha «sýperchempıon» ataǵyn, sondaı-aq WBO (Búkilálemdik boks uıymy) jáne IBF (Halyqaralyq boks federasııasy) chempıondary ataǵyn qorǵaıdy. 34 jastaǵy Aleksandr Povetkın WBA chempıony belbeýiniń ıegeri. Buǵan qosa, ekýi de áýesqoılar rınginde Olımpıada chempıony atanyp úlgergen.
Al kásipqoılar arasynda Vladımır Klıchko 63 urys ótkizip, sonyń 60-ynda jeńiske jetti. Bulardyń 51-in nokaýtpen bitirdi. Biraq sońǵy 9 jylda jeńilip kórgen joq. Sonymen birge, 3 urysta jeńilistiń ashy dámin tatty. Aleksandr Povetkın barlyq ótkizgen 26 jekpe-jeginde mereıi ústem boldy. Solardyń 18-i nokaýtpen bitti.
Shaıqastyń aldynda aldymen Ýkraınanyń, sosyn Reseıdiń gımnderi oınaldy. Budan keıin eki alyptyń talasyna kezek berildi.
Birinshi qaraǵanda, eki boksshynyń túri de qobaljýly kórindi. Tipti Klıchko sharshaýly sııaqty.
Sonymen, 1-raýnd. Ázirge Aleksandr erkindeý qımyldap júr. Al Vladımır óte saq. Sálden keıin onyń artyqshylyǵy baıqala bastady. Jalpy alǵanda, bul raýndta boksshylardyń soqqy jasaǵannan góri qushaqtasýy, ıaǵnı klınchke túsýi kópteý boldy.
2-raýnd. Boıy alasa Povetkın qarsylasyna barynsha jaqyn kelgisi kelip umtylady. Al Klıchko oǵan qatty soqqy jasaýǵa múmkindik berer emes. Biraq ózi de aıryqsha soqqy jasaı qoıǵan joq. Kenet... ol sol qolymen qatty uryp, Sashany qulatyp túsirdi. Nokdaýn! Arbıtr esepti sanaýǵa kóshti. Osymen raýnd bitti.
3-raýnd. Bul kezeńde Aleksandr óziniń osynyń aldyndaǵy sátsizdigin qaıtarǵysy kelip, shabýylǵa shyqty. Onyń eki soqqysy jaqsy tıdi. Degenmen, Vladımırdiń qorǵanysy kúshti. Ol qarsylasynyń qatty soqqy jasaýyna erik bermeı júr.
4-raýnd. Povetkınniń qımyly tym jadaǵaı. Onyń kelesi kezekte ne isteıtinin Klıchko udaıy bilip qoıady. Sondyqtan ony mańyna jaqyndatpaıdy. Klıchkonyń shaıqasta esepti óte jaqsy quratynyn buryn da mamandar aıtatyn. Ol sony osy jerde taǵy dáleldep berdi. Bul raýnd ta eshkimniń artyqshylyǵyn baıqatpady. Biraq Klıchkonyń bir nokdaýny bar.
5-raýnd. Sport keshenindegi jankúıerler Sashany jelpindirýge tyrysyp-aq jatyr. Biraq reseılik boksshy burynǵy qalpynan tanar emes. Onyń qımylynda jańalyq joq. Bári jattandy. Taptaýryn. Bul Klıchko úshin óte durys bolyp tur. Eger shaıqas budan ary da solaı bola berse, Klıchkonyń upaı sanymen jeńip ketýi múmkin. Mine, ol qorǵanyp júrip-aq djebpen eki soqqy jasap úlgerdi.
6-raýnd. Urys qımylynda ózgeris joq. Povetkın burynǵysynsha tank sekildi týralap alǵa umtylýda. Onyń bul áreketi ázirge ózin aqtaı almaı júr. Qaıta solaı júrip, soqqy alyp qalyp jatyr. Ol qaıta-qaıta qarsylasynyń djebine túsip qalýda.
7-raýnd. Urysta áli ózgeris joq. Mine, Povetkın taǵy da Klıchkonyń djebine túsip qaldy. Nokdaýn! Kóp ótken joq, Vladımır taǵy da uryp túsirdi. Taǵy nokdaýn! Úshinshi márte! Joq, endi bitti. Mine, taǵy bir soqqy! Taǵy nokdaýn! Tórtinshi márte. Biraq arbıtr shaıqasty toqtatar emes. Negizinde bir raýndta 3 nokdaýn alǵan adamǵa jeńilis berilýi kerek. Shamasy, Povetkın alań ıesi bolǵasyn, ony shyǵaryp tastaýǵa batyly barmaǵan shyǵar.
8-raýnd. Boksshylar taǵy da rıng ortasynda toqaılasty. Taǵy da klınch. Sebebi, Povetkınniń soqqy jasaýyna múmkindik bergisi kelmegen Klıchko tez onyń qarýyn paıdalandyrmaı tastaıdy. Osylaı júrip-aq Volodıa upaı jınap qalýda. Onyń jekelegen soqqylary dál tııýde. Áıtkenmen, eki boksshynyń da sharshap qalǵandary baıqalady. Búkil urys kúshke salyp ótýde. Buǵan birinshi kezekte Povetkın kináli.
9-raýnd. Taǵy baıaǵy kórinis. Taǵy ta kúshke salý. Sondaı teketires kezinde Klıchko qarsylasyn ıterip qulatty. Sodan soń eki ret jaqsy djeb ótkizdi. Munda onyń ustanǵan taktıkasy óte tıimdi bolyp tur. Sonyń negizinde Povetkın taǵy eki ret onyń djebin jiberip aldy. Urystyń sıpaty boksshylardyń bir-birine hýk pen apperkot jasaýlaryna jaqyndatpaı tur.
10-raýnd. Mine, chempıondyq raýnd ta bastaldy. Sońǵy úsh raýndty mamandar osylaı ataıdy. Sebebi, urystyń taǵdyry osy kezderi sheshiledi. Degenmen, ýkraın tarlanynyń endi jeńisti bere qoımaıtynyna kóńil senip qalǵandaı. Oǵan Povetkınniń bir jaqty qımylǵa quralǵan taktıkasy da sebep bolyp otyr. Ol osy raýndta da Vladımırdiń óte kóp soqqysyn alyp qaldy.
11-raýnd. Osy ýaqytqa deıin Povetkın qarsylasyna uqsatyp bir soqqy bere alǵan joq. Bul raýndta da ýkraın boksshysynyń artyqshylyǵy baıqalyp tur. Biraq ol jaǵdaıdy ýshyqtyrmaı, aqyryn ǵana jeńiske jetýge bekingen sııaqty.
12-raýnd. Vladımır Klıchkonyń soqqylary joıqyn. Onyń Aleksandr Povetkın ashyq qalǵan kezde urǵandary qatty tıip jatyr. Alaıda, sharshaǵandiki shyǵar, ýkraın jigiti de qatelesip ketýde. Endi shaıqastyń aıaqtalýyna bir mınýttaı ǵana qaldy. Osy tusta keremet bir soqqy berip, nokaýtqa túsirmese, Povetkınniń jeńe qoıýy ekitalaı. Sońǵy sátter eki jaqtyń birdeı talmaı urys salýymen ótti.
Gong! Shaıqas aıaqtaldy. Kimniń jeńgeni aıtpasa da túsinikti. Ol, árıne, Vladımır Klıchkonyń ýysynda ketti. Al Povetkınge talmaı, sharshamaı shaıqasqa úshin ǵana razy bolýǵa bolady. Al Klıchko syndy uly boksshyny jeńý onyń oń jambasyna kelmeıtin sharýa bolyp shyqty.
Mine, tóreshiniń úsheýi de jeńisti Vladımır Klıchkoǵa berdi. Taza jeńis! Talassyz jeńis! Osy urystyń aldynda ábden bórikken reseılik kommentatorlardyń kómeılerin bitedi bul jeńis!
Biz jerlesimiz Vladımır Klıchkony osy uly jeńisimen quttyqtaımyz. Semeı topyraǵyna qany tamǵan tarlan taǵy da óziniń myqty ekenin tanytty.
Al Povetkın kásipqoılar rınginde óziniń birinshi jeńilisine ushyrady.
Vladımır Klıchko 9 jyldan beri úzilmeı kele jatqan jeńisti jolyn jalǵady. Bizdiń osy shaıqas aldynda aıtqan boljamymyz týra keldi.
Rýslan Igilik.