Keshe túnde, dáliregi, qazannyń 5-inen 6-na qaraǵan túni, Astana ýaqytymen saǵat 1 men 3-tiń aralyǵynda Máskeýde orys Aleksandr Povetkın men ýkraın Vladımır Klıchkonyń arasynda asa aýyr salmaqta álem chempıondyǵyn sarapqa salǵan jekpe-jek bolyp ótti. Biz bul týraly sol ýaqytta saıtta reportaj júrgizgenbiz.
Barlyq 12 raýnd boıy basymdylyq jáne 4 nokdaýn. Mine, Vladımır Klıchkonyń bul shaıqastaǵy basymdylyǵy osyndaı boldy.
Qazir Reseıdiń barlyq gazetteri men aqparat agenttikteri ózderiniń Aleksandr Povetkınniń osynshalyqty myqty qarsylasqa 12 raýnd boıy tótep bergenin maqtanysh etip, qaıta-qaıta aıtyp jatyr. Al osy urystyń aldynda olar basqasha saırap edi. Sol sátte olardyń bári de Povetkınniń jeńetinine eshqandaı kúmándanbaǵan. Endi onyń nokaýtpen utylyp qalmaǵanynyń ózin úlken erlikke balaýda. Mine, pikir degen aıaq astynan qalaı ózgeredi! Tipti dál qazir ǵana «Birinshi arnadan» tóreshiler ádildik kórsetpedi, dep te mińgirlep qoıdy.
Shyndyǵynda arbıtrlar Klıchkoǵa qııanat jasady. Eger olar adal bolsa, shaıqasty Vladımır qarsylasyn 3 ret nokdaýnǵa jibergen 7-raýndta toqtatýy tıis edi. Qandaı jekpe-jekte de bir raýnd qana emes, jalpy urystyń ózinde 3 nokdaýnnan keıin teketires toqtatylady. Al ýkraın boksshysy 2-raýndtaǵy birinshi nokdaýnyn eseptegende, qarsylasyn 4 ret eseńgiretip tastady.
Bir basylym «Aleksandr Povetkın proıgral, no pokazal nastoıashıı harakter» dep jaıyldy.
Aıtatyny joq, osy «ǵasyr shaıqasynyń» aldyndaǵy dúrbeleń óte qatty boldy. Onyń kóbinde Reseı basylymdary óz qabylandarynyń jeńetinderine esh shúbá keltirmedi.
Bul ajıotaj urystyń basynda da baıqaldy. Birinshi mınýttardan Povetkınniń qorǵanysta otyrmaıtyny aıqyndaldy. Ol birden alǵa umtyldy. Al Klıchko mundaı taktıkaǵa daıyn bolyp shyqty. Ýkraın boksshysy óziniń súıikti taktıkasy – klınchti jıi qoldana bastady. Boıy da, qoly da qysqa Povetkın alǵa kele bergende, ózine tym jaqyn jiberip alyp, birden qaýmalap qushaqtaı qoıady. Al alysta júrgeninde jeke-dara soqqylarymen qaıta-qaıta qarsylasynyń kekilin jelp-jelp etkizedi. Mundaı urysta kimniń djebti jaqsy qoldanatyny anyq kórinedi. Bul jaǵynan Vladımır taǵy da basym túsip jatty. Al Povetkınniń tarapynan taza barǵan soqqylar basynda tipti bolǵan joq.
Shaıqastyń ortasyna qaraı Aleksandrdyń sharshaǵannan qulap qala jazdap júrgeni ańǵaryldy. Sol kezde ol ýkraın boksshysynyń qarmaǵyna úsh ret túsip qaldy. Osy kezde tóreshilerdiń jeńisti birden Vladımırge berip jiberetin reti keldi. Biraq, olaı bolmady. Bul jerde Povetkınge bir rıza bolatynyń – ol árbir aýyr soqqydan keıin esin tez jıyp, taǵy da ólermendikpen alǵa umtyla berdi. Taǵy da basynan jeke soqqylar alý úshin...
Tek sońǵy raýndta ǵana Aleksandr Vladımırdiń júıkesine tıetin birer soqqy jasaı aldy. Alaıda, bul kezde kimniń jeńgeni 200 paıyzǵa belgili bolyp tur edi. Sharshy alańdaǵy shaıqasty kórgen kirpiniń ózi Vladımır Klıchkonyń alyp ta, shalyp ta jyǵyp turǵanyn baıqaǵan bolar edi.
Qorytyndy aıqyn: Vladımır Klıchko esh talassyz taza jeńiske jetti. Tóreshilerdiń úsheýi de búkil 12 raýnd boıyna barlyq jeńisti sonyń esebine jazdy. Buǵan qosatynymyz, jeńimpazdyń bul shaıqasta alǵan qalamaqysy 17 mln. dollarǵa jaqyndady.
Iá, Aleksandr Povetkındi qaıtpaı shaıqasqany úshin maqtaýǵa bolatyn shyǵar. Al jeńilgenin ózi de birden moıyndady. Sonyń syńaıynda qarymta match týraly da aıtyp qaldy. Alaıda, onyń jaqynda bola qoımaıtyn túri bar. Tipti, bolǵan kúnde de onyń Povetkınniń paıdasyna sheshiletinine úlken kúmán bar. Myna jeńilisten keıin ol kúsh jaǵynan da, júıke jaǵynan da qalpyna kelip alýy kerek.
Bul kúni «Olımpııskıı» rınginde taǵy birneshe qosymsha jekpe-jekter bolyp ótti. Aldymen reseılik Grıgorıı Drozd Eýropa chempıony polıak Mateýsh Masternakty erkin utty. Kelesi shaıqasta reseılik Rahım Chahkıev rýmyn Ilıeni nokaýtqa túsirdi. Al ózbekstandyq Rýslan Chagaev serb Iova Pýdardy upaı sanymen utty.
Rýslan Igilik.