Túrkııanyń shyǵysyndaǵy Bıngıol provınsııasynda magnıtýdasy 5,7 bolatyn jer silkinisi boldy, - dep habarlaıdy Anadolu agenttigi.
Túrkııa úkimeti janyndaǵy tótenshe jaǵdaılardyń aldyn alý jáne joıý basqarmasynyń málimetinshe, jer silkinisi týraly aqparat jergilikti ýaqyt boıynsha saǵat 17:24-te tirkelgen. Jer dúmpýiniń epısentri Karly ýeziniń aýmaǵynda bolǵan. Zilzala Erzýrým, Trabzon, Erzındjan, Kars, Batman, Dııarbaqyr, Sıırt, Mardın, Elıazyg jáne Malatıa provınsııalarynda da sezilgen. Jergilikti bılik ókilderiniń aıtýynsha, oqıǵa saldarynan 18 adam jaraqat alyp, 1 adam kóz jumǵan.
Bıngıol provınsııasynyń gýbernatory Ekındjıdiń sózine súıensek, Kaınarpynar aýylynda jer silkinisi kezinde polısııa basqarmasynyń eki baqylaý munarasyna zaqym kelgen, saldarynan qaýipsizdik qyzmetiniń úsh qyzmetkeri jaraqat alǵan. Sondaı-aq qurylys qaldyqtarynyń úıindileri arasynan jeti adam shyǵarylǵan. Olardyń bireýi birshama ýaqyt ótken soń qaıtys bolǵan.
Sonymen qatar, Elmalı jáne Dınarmeı eldi mekenderinde 10-ǵa jýyq úı zaqymdalypty. Túrkııa Ishki ister mınıstrligi óńirge 26 kólik quraly, 109 adamnan turatyn dárigerler men qutqarýshylar toby jiberilgenin habarlady. Vedomstvoda qosymsha kómek qajet bolǵan jaǵdaıda, eki áskerı ushaq daıyn ekeni aıtyldy.