Búgin Májilistiń jalpy otyrysynda birqatar depýtattyq zań jobasy maquldandy, - habarlady Májilistiń baspasóz qyzmeti.
Atap aıtqanda, depýtattar qaldyqtardy energetıkalyq kádege jaratý máselelerine qatysty zań jobasyn birinshi oqylymda maquldady.
Qujat tujyrymdamasynda turmystyq qatty qaldyqtardy jaǵý arqyly olardy kádege jaratý kózdeledi. Bul qaldyqtardyń qorshaǵan ortaǵa teris áserin azaıtýǵa jáne olardyń kómýge jatatyn kólemin qysqartýǵa múmkindik beredi.
Zań jobasynyń tujyrymdamasyna sáıkes negizgi qoldaý tetigi qoqys jaǵatyn kásiporyndar óndirgen elektr energııasyn kepildi satyp alý. Ol jańartylatyn energetıka salasyn qoldaýdyń qoldanystaǵy tetigine uqsas bolady.
Osyǵan baılanysty, zań jobasynda Ekologııalyq kodeks pen "Elektr energetıkasy týraly" jáne "Jańartylatyn energııa kózderin paıdalanýdy qoldaý týraly" zańdarǵa túzetýler engizý kózdelgen.
Zań jobasyn talqylaý barysynda depýtattar jergilikti atqarýshy organdardy qoqys jaǵatyn kásiporyndardy qaldyqtardyń qajetti kólemimen qamtamasyz etýge mindetteıtin normany alyp tastaýdy; Ekologııalyq kodekstegi jergilikti atqarýshy organdardyń jer zańnamasyna sáıkes qaldyqtardy energetıkalyq kádege jaratý jónindegi obektilerdi qamtıtyn áleýmettik ınfraqurylymdy salý úshin jer ýchaskelerin bólýi máselelerin naqtylaýdy; qoldanystaǵy zańnamamen jáne Májilis qaraýyndaǵy zań jobalarynyń normalarymen úılestirý maqsatynda quqyqtyq kollızııalardy joıý týraly jáne basqa da usynystar men túzetýler engizdi.
Sonymen qatar, jalpy otyrysta Memlekettik shekara týraly zań jobasy birinshi oqylymda maquldandy.
Zań jobasynda ótkizý pýnktterinde quqyq qorǵaý men arnaýly organdar, prokýratýra organdary qyzmetkerleriniń bolý tártibin reglamentteıtin, Qazaqstan Respýblıkasynyń Memlekettik shekara týraly zańnamasyn buzýdyń yqtımal táýekelderin tómendetýge baǵyttalǵan normalar kózdeledi.
Zań jobasymen Ulttyq qaýipsizdik komıteti Shekara qyzmetiniń qajetti ınjenerlik-tehnıkalyq quraldardy, qurylystar men bógeýishterdi ornatý jónindegi quzyreti naqtylanady.
Sonymen qatar, jalpy otyrysta depýtattar Senattyń «Halyq densaýlyǵy jáne densaýlyq saqtaý júıesi týraly» Kodeksine engizgen túzetýlerimen kelisti.
Búgin Palata birqatar jańa zań jobalaryn jumysqa aldy. Olardyń qatarynda bıýdjet zańnamasyn jetildirý máseleleri týraly zań jobasy, Sondaı-aq, Qazaqstan men Mońǵolııa arasyndaǵy azamattyq jáne qylmystyq ister jónindegi ózara kómek týraly Shartqa ózgerister engizý týraly hattamany ratıfıkasııalaý týraly jáne EAEO pen oǵan múshe memleketter jáne Serbııa arasyndaǵy erkin saýda týraly kelisimdi ratıfıkasııalaý týraly zań jobalary bar. Osylarmen qatar, Kaspıı teńizinde qyzmetti júzege asyrýǵa baılanysty zań jobasyna túzetý engizý týraly zań jobasy bar.
Jalpy otyrys sońynda halyq qalaýlylary memlekettik organdardyń basshylaryna birneshe depýtattyq saýaldar joldady. Olar P. Kazansev, M. Qazbekova, J.Ahmetbekov, S. Qanybekov.