Indýstrııa jáne ınfraqurylymdyq damý mınıstri Beıbit Atamqulov QR Premer-Mınıstri Asqar Mamınniń tóraǵalaǵymen ótken Úkimet otyrysynda jylytý maýsymyna daıyndyq barysyn baıandady, - dep jazady Egemen.kz
Mınıstr 2019-2020 jylǵy jylytý maýsymy turaqty rejımde ótkenin aıtty. Atalǵan kezeńde 24 tehnologııalyq buzýshylyq boldy. Bul 2018-2019 jylǵy tıisti kezeńimen salystyrǵanda 33 jaǵdaıǵa az. Barlyq tehnologııalyq buzýshylyqtar normatıvtik merzimde joıyldy.
2020 jylǵy qańtar-mamyr aılarynda shamamen 44 mln tonna kómir óndirildi. Onyń ishinde 24,1 mln tonna energııa óndirýshi kásiporyndarǵa, 2,7 mln tonna kommýnaldyq turmystyq sektor jáne halyqqa jóneltildi.
Mınıstrlik jergilikti atqarýshy organdarmen birlesip, 2019-2020 jylǵa Kommýnaldyq turmystyq qajettilikter men halyqtyń kómir ónimine degen tutyný josparyn jasady. Apta saıyn monıtorıng júrgizilip otyrdy. Kómir tapshylyǵy bolǵan joq.
Ákimdikterdiń kómirdi erte satyp alýynyń arqasynda suranys kúrt artqan kezde de dúrbeleń bolǵan joq. О́tken jylytý maýsymynda óńirlerde jeke jáne zańdy tulǵalardyń kommýnaldyq qyzmetter aldyndaǵy debıtorlyq bereshegi 13 mlrd. teńgeni qurady. Bul ótken jyldyń tıisti kezeńimen salystyrǵanda 780 mln. teńgege kóp. (2019 jyly - 12 286 mln. teńge). Bereshegi eń kóp óńirler: Almaty qalasynda - 2 mlrd 177 mln teńge, Nur-Sultan qalasynda – 1 mlrd 928 mln teńge, Shymkent qalasynda – 1 mlrd 924 mln teńge, Mańǵystaý oblysynda – 1 mlrd 525 mln teńge.
Ákimdikter boryshkerlermen debıtorlyq bereshekti óteý jáne azaıtý boıynsha júıeli sharalar júrgizip jatyr (kassalyq qyzmet kórsetýdi jaqsartý boıynsha, tutynýshylardyń bereshegi týraly shot - habarlamalardy taratý boıynsha, eskertý týraly habarlamalardy taratý boıynsha, kireberisterde habarlandyrýlardy ilý boıynsha, materıaldardy sot organdaryna berý boıynsha jumystar).
2020-2021 jylǵy jylytý maýsymyna daıyndyq maqsatynda Mınıstrlik ákimdikterge barlyq turǵyn úı-kommýnaldyq sharýashylyq, áleýmettik sala obektilerin jáne turǵyn úılerdi jylytý maýsymyna daıyndaý úshin jumys josparyn jiberdi.
Jergilikti atqarýshy organdarmen birlesip, óńirler boıynsha aı saıynǵy qajettilikti kórsete otyryp, kommýnaldyq-turmystyq maqsatqa jáne halyqqa arnalǵan kómirdiń qajettilik jospary jasaldy.
Jalpy, jylytý maýsymyna daıyndyq qyzý júrip jatyr. Kómir tapshylyǵy bolmaýy tıis. Qyrkúıek-qarasha aılarynda dúrligýdi boldyrmaý úshin ákimdiktermen birlesip halyqqa arnalǵan kómirdi erterek satyp alý jumystary júrgizilýde.
Bıyl oqý jyly bastalǵanǵa deıin 10 myńdaı bilim berý obektisin daıyndaý josparlanǵan.
Densaýlyq saqtaý obektileri men turǵyn úılerdiń daıyndyǵyna basa nazar aýdarylady. 6 myńdaı densaýlyq saqtaý obektisi men 47 myń turǵyn úıdi daıyndaý josparlanǵan.
Halyqty jylýmen jáne sýmen úzdiksiz qamtamasyz etý úshin 10 myńnan astam avtonomdyq qazandyqty, 5 myń shaqyrym jylýmen jabdyqtaý jelisin jáne 13 myń sýmen jabdyqtaý jelisin daıyndaý kerek.
Sondaı-aq, avtonomdyq qazandyqtardy kómir jáne mazýtpen qamtamasyz etý kerek. (1 mln 200 myń tonnadan astam kómir jáne 52 myń tonna mazýt).
"Qazaqstan temir joly" kómir razrezinen óńirlerdiń temir jol tuıyqtaryna deıin vagondardy ýaqytynda jetkizip, kómir tasymalyn júzege asyrady.
Kómir daıyndaý boıynsha monıtorıng Mınıstrliktiń turaqty baqylaýynda.