Olımpıada oıyndarynyń qos birdeı qolasyn ıelengen Ivan Dychko rıngke qaıta oralady. Kelesi jekpe-jegin ol 6 maýsym kúni jeńilis kórmegen brıtandyq Harvı Daıkspen ótkizedi, dep habarlaıdy Egemen.kz
Qazaqstandyq kásipqoı boksshy Ivan Dychko kelesi jekpe-jeginiń ótetin kúnin jáne qarsylasyn anyqtady. 6 maýsymda ol Anglııanyń Bornmýt qalasynda ótetin Zuffa Boxing 07 týrnırinde aýyr salmaqta óner kórsetedi.
Dychkonyń qarsylasy brıtandyq Harvı Daıks. Ol kásipqoı rıngte áli jeńilip kórmegen. Onyń esebinde jeti jeńis jáne bir teń nátıje bar. Alaıda brıtandyq boksshy ázirge birde-bir jekpe-jegin merziminen buryn aıaqtamaǵan. Iаǵnı, barlyq kezdesýleri tóreshiler sheshimimen sheshilgen.
Dychkonyń jekpe-jegi boks keshiniń anderkartynda ótedi. Bul keshtiń basty oqıǵasy – birinshi aýyr salmaqtaǵy burynǵy WBO chempıony Krıs Bıllam-Smıt pen kanadalyq Raıan Rozıskı arasyndaǵy aıqas bolmaq.
Byltyr qyrkúıekte Dychko Terens Kroýford pen Saýl Alvares qatysqan boks keshiniń anderkartynda jeńilis tapqan edi. Qazaqstandyq boksshy amerıkalyq Djermeın Franklın-kishige tóreshiler sheshimimen utylyp qaldy.
Qazir Ivan Dychkonyń kásipqoı bokstaǵy nátıjesinde 15 jeńis (onyń 14-i – nokaýtpen) jáne bir jeńilis bar. Áýesqoı boksta Ivan eki márte Olımpıada oıyndarynyń qola júldegeri (2012, 2016), Azııa oıyndary men Azııa chempıonatynyń jeńimpazy jáne álem chempıonatynyń kúmis júldegeri atanǵan.
Aıta keteıik, Zuffa Boxing – UFC prezıdenti Dana Ýaıt pen yqpaldy promoýter Týrkı Ál-Sheıh birigip qurǵan jańa kásibı boks lıgasy. Qazaqstandyqtar arasynda Ivan Dychkodan bólek, Olımpıada chempıony Danııar Eleýsınov te osy lıgamen kelisimshart jasaǵan.