Qazaqstannyń Azamattyq Alıansy Keńesiniń kezekten tys otyrysy epıdemıologııalyq jaǵdaıǵa baılanysty onlaın rejımde ótti. Otyrystyń qorytyndysy boıynsha Saltanat Temirqulqyzy Rahımbekova Qazaqstan Azamattyq Alıansynyń Prezıdenti etip saılaý týraly sheshim qabyldandy, - dep habarlaıdy Egemen.kz.
Saltanat Rahımbekova 1965 jyly 18 aqpanda dúnıege keldi, jasyl ekonomıka jáne ekologııa salasyndaǵy belgili qoǵam qaıratkeri, birqatar úkimettik emes uıymnyń - G-Global jasyl ekonomıka jáne damý koalısııasy, EXPO&Women halyqaralyq uıymy, Qazaqstan áıelderiniń agrarlyq odaǵynyń negizin qalaýshy jáne jetekshisi, ekonomıka ǵylymdarynyń doktory, Qazaqstan Respýblıkasy Prezıdentiniń janyndaǵy Qazaqstannyń jasyl ekonomıkaǵa ótýi jónindegi Keńestiń múshesi, Ekologııa, geologııa jáne tabıǵı resýrstar mınıstrliginiń Qoǵamdyq keńesiniń tóraǵasy.
"Qurmet" ordenimen, Qazaqstan Respýblıkasy Prezıdentiniń Qurmet gramotasymen jáne Qazaqstan Respýblıkasynyń bes mereıtoılyq medalimen marapattalǵan.