Qostanaı oblysy aýmaǵynda dinı mazmundaǵy materıal taratqan Reseı azamatyna aıyppul salyndy, - dep habarlaıdy Egemen.kz.
Oblys prokýratýrasynyń ekstremızmge qarsy is-qımyl basqarmasynyń qyzmetkerleri áleýmettik jelilerge monıtorıng júrgizý barysynda Qostanaı oblysynda turatyn 38 jastaǵy RF azamatynyń dinı mazmundaǵy materıaldar taratqanyn anyqtap, eki ret ákimshilik jaýapkershilikke tartqan.
Oǵan alǵash 2020 jylǵy naýryz aıynda Qostanaı qalasynyń soty radıkaldy-dinı aǵymdy nasıhattaıtyn beınematerıaldar taratqany úshin 185 570 teńge aıyppul salǵan. Bul jaza asa áser ete qoımasa kerek, mamyr aıynda Qostanaı qalasynyń mamandandyrylǵan ákimshilik soty dál osy azamatqa QR ÁQBtK-niń 490-baby boıynsha taǵy 138 900 teńge aıyppul salǵan.
Jyl basynan beri aımaqta 6 adam radıkaldy jáne destrýktıvti dinı mazmundaǵy materıaldardy saqtaǵany jáne taratqany úshin QR ÁQBtK-niń 453, 490-baptary boıynsha jalpy kólemi 1 mıllıon teńgeden astam aıyppul túrindegi ákimshilik jaýapkershilikke tartylǵan.
Oblys prokýratýrasynyń ekstremızmge qarsy is-qımyl jónindegi basqarmasy oblys turǵyndaryna kúmándi saıttar men toptarǵa kirmeýge keńes beredi.
Qostanaı oblysy