Búgin "KomekAtyrau" qoǵamdyq birlestiginiń uıymdastyrýymen tegin dári-dármekti taratý aksııasy ótýi tıis edi, - dep jazady Egemen.kz
Bul týraly keshe áleýmettik jelilerde habarlanǵan bolatyn. Alaıda, búgin tegin dári-dármek taratylmady. Buǵan sanıtarlyq talaptyń saqtalmaǵany sebep bolyp otyr. Aksııany uıymdastyrýshylardyń aıtýyna qaraǵanda, dári-dármekti 200 adamǵa taratý josparlanypty. Degenmen, tegin dári-dármekti alýǵa 700-den 1000-ǵa jýyq adam kelipti.
Osyǵan baılanysty Atyraý qalalyq ákimdigi tómendegideı málimdeme jasady.
"Búgin, 4 shildede «KomekAtyrau» qoǵamdyq birlestiginiń uıytqy bolýymen dári-dármek taratý aksııasy uıymdastyryldy. Uıymdastyrýshylar qaýipsizdik sharalary men áleýmettik qashyqtyqty saqtaýdy qamtamasyz ete almady. Atyraý qalalyq ákimdiginiń bul aksııany uıymdastyrýǵa qatysy bolǵan joq. Qazirgi ýaqytta aksııa toqtatyldy. Uıymdastyrýshylar jaýapkershilikke tartylady.
Ákimdik óńirde halyqqa qajetti dári-dármekti jetkizýdi uıymdastyrý sharalary qabyldanǵanyn habarlaıdy. Mundaı aksııany uıymdastyrýshylar birinshi kezekte halyqtyń qaýipsizdigin oılastyrýy qajet. Barlyq aksııa zańdylyqqa saı uıymdastyrylýy tıis. Ákimdik halyqqa kómek berý jónindegi qosymsha usynystardy qarastyrýǵa daıyn ekenin bildiredi", -degen aqparat taratty Atyraý qalalyq ákimdiginiń baspasóz qyzmeti.
Oblystyq polısııa departamentiniń baspasóz qyzmeti aksııaǵa jınalǵan halyqtyń taraǵanyn málim etti.
"Polısııa qyzmetkerlerimen aksııaǵa jınalǵan halyq taratyldy. Al, 7 adamǵa qatysty jınaqtalǵan is qujattary sheshim qabyldaý úshin Atyraý qalalyq taýarlar men kórsetiletin qyzmetterdiń sapasy men qaýipsizdigin baqylaý basqarmasyna tapsyryldy", -dep habarlady departamenttiń baspasóz qyzmeti.