Qaraǵandy oblysynyń ákimi Jeńis Qasymbek óńirdegi qalalar men aýdandardyń ákimderine áleýmettik jelilerde turǵyndarmen keri baılanys ornatý jumysynyń tıimdiligin arttyrý jóninde tapsyrma berdi, – dep habarlaıdy Egemen.kz oblys ákiminiń baspasóz qyzmetine silteme jasap.
Iаǵnı, budan bylaı ákimder áleýmettik jelilerdegi belsendilikterin arttyryp, Facebook pen Instagram-da óz akkaýnttaryn júrgizýmen qatar, "Ákim saǵaty" tikeleı efırin ótkizýge mindetti boldy.
Oblys ákimi Jeńis Qasymbek pandemııanyń ákimdikterdiń jumysyna tikeleı áserin tıgizip, ózgerister engizip jatqanyn atap ótti. Máselen, qazirgi tańda jeke qabyldaýlar ótkizilmeıdi, halyqpen jıyndar men kezdesýler uıymdastyrýǵa bolmaıdy. Iаǵnı, mundaı jaǵdaıda azamattardyń máselelerin sheshý jáne ótinishterine qulaq asý úshin qarapaıym ári tıimdi mehanızm usynýdyń qajettiligi týyndady.
"Oblys turǵyndarynyń óńirdegi barlyq deńgeıdegi ákimdermen tikeleı ózara árekettestik ornatý múmkindigi bolýy tıis. "Ákim saǵaty" aýyl jáne qala turǵyndarynyń naqty máselelerin sheshý boıynsha tıimdi alańqaıǵa aınalady degen senimdemin", – dedi apparat keńesinde Jeńis Qasymbek.
Mundaı efırler seısenbi kúni saǵat 09.00-den 10.00-ge deıin jáne juma kúni saǵat 15.00-den 16.00-ge deıin aptasyna eki ret ótkiziletin boldy. Mysaly, Nura aýdanynyń ákimi seısenbi jáne juma kúnderi saǵat 11.00-den 12.00-ge deıin halyqpen ınternet-kezdesýler ótkizse, Ulytaý aýdanyń basshysy da sol kúnderi 12:00-den 13:00-ge deıin onlaın-kezdesý uıymdastyrady.
Qala jáne aýdan ákimderi turǵyndar tarapynan qoıylatyn suraqtarǵa onlaın rejiminde jaýap berip, olardyń ótinish-tilekterin qabyldaıtyn bolady.