Sońǵy kúnderi Almatyda onlaın-brıfıngterdiń barlyǵy derlik qalany qajetti dári-dármekpen qamtamasyz etýge qatysty boldy. Qala ákiminiń jýrnalıstermen qashyqtan ótkizgen jıyny da dál osy máselege arnaldy.
Osyǵan deıin habarlanǵandaı, Qazaqstanǵa dárilik preparattarymen 3 bort kelgen edi. Almaty qosymsha taǵy 3 mln-nan astam dári kútip otyr, onyń ishinde dene qyzýyn túsiretin preparattar, antıkoagýlıanttar jáne antıbıotıkter bar.
Sonymen, dúısenbi kúni kezekti ret Almaty bıligi shaharda qajetti preparattar jetkilikti ekenin resmı túrde málimdedi. Alaıda áleýmettik jelide kóptegen dári-dármektiń áli de qat ekendigi týraly aqparattar kezip júr. Al Almaty qalasy ákiminiń orynbasary Saparbek Tuıaqbaevtyń aıtýynsha, kópshilik indettiń órshýinen qorqyp otyr. Sondyqtan bul dúrbeleń týǵyzyp, jurt dárilerdi jappaı satyp alyp jatyr. Onyń aıtýynsha, qazir qalada 185 myń dana parasetamol bar. 16 shildeden bastap aıdyń sońyna deıin 2,2 mln dana taǵy kelýi tıis. Buǵan qosymsha arnaıy qor taǵy 3 mln qaptamamen qamtamasyz etilmek.
– Bul úshin eldi dúrliktirýdiń qajeti joq. О́kinishke qaraı áli de áleýmettik jelilerde haıp jasap otyrǵan adamdar bar. Qaladaǵy áleýmettik mańyzy bar 10 dárihanany dári-dármekpen qamtamasyz etýdi shektep otyrǵan joqpyz. Bárine berip jatyrmyz. Biz bul isti uıymdastyrýǵa kez kelgen ýaqytta yqpal ete alamyz, – deıdi S.Tuıaqbaev.
Ákim orynbasary basqa da dárihanalarǵa ózderin qajetti preparattarmen tolyqtyryp otyrý úshin ákimdikke habarlasý qajettigin aıtady. Qysqasy, qala bıligi dári-dármek tapshylyǵyn joıýdyń barlyq tetikterin qarastyratynyn alǵa tartyp otyr.
– Eger kimde-kim jaı ǵana haıp jasaǵysy kelse – óz sharýasy. Biz búkil ınfraqurylymdy daıyndap otyrmyz. Áli kúnge deıin «dári-dármek jetispeı jatyr, kórsetilip jatqan sandar durys emes» dep baıbalam salý – bul endi shekten asqandyq. Barlyq aqparatty biz málimdeýge de, dáleldeýge de daıynbyz, – deıdi S.Tuıaqbaev.
Onyń aıtýynsha, 2 apta buryn pandemııaǵa baılanysty jekelegen dárilerge suranys edáýir ósip ketken. «Parasetamoldy qalanyń jalpy tutynýy mamyr aıynda 50 myń bolsa, sońǵy eki aptada kúnine 100 myń satyldy. Buryn jyl boıy termometrdiń 100 myńy saýdalansa, 2-3 kúnde 50 myń termometr satylyp ketken. Sondyqtan suranystyń ósýine baılanysty da tapshylyq týyndap otyr. Qazir máseleni turaqtandyrý úshin kúnine 2 ret monıtorıng jasap otyrmyz. Bastapqyda dárihanalardyń ınfraqurylymy suranysqa daıyn emes bolatyn. Másele sheshildi. Sońǵy bir aptada úlken dúrligý joq», dep sendirdi ol.
Ákimniń orynbasary qazir dárihanalarda 6 myń termometr bar ekenin aıtady. 1 shildeden bastap Almaty dárihanalaryna 900 myńǵa jýyq dári jetkizilgen.
«Odan bólek kúndelikti búkil kompanııalarda, dárihanalar qoımasynda da dáriniń bizdegi qoryna monıtorıng jasap otyrmyz. 846 myń dana dári bar. 1 aı kóleminde kerekti preparattardyń 3 mln 685 qaptamasy kelýi tıis. Parasetamoldyń 185 myń danasy bar. 16 shildeden bastap aı sońyna deıin 2,2 mln qaptamasy keledi. Sondyqtan keıbir azamattardyń dári joq dep dabyl qaqqany shyndyqqa sáıkespeıdi», dedi S.Tuıaqbaev.
Sonymen qatar Almatyda farmasevtıkalyq óndiris pen jeke qorǵanys quraldary óndirisi boıynsha birneshe joba qolǵa alynbaq.
«О́ndiriske keler bolsaq, farmasevtıkalyq óndiris pen jeke qorǵanys quraldary óndirisi boıynsha birneshe jobany qarastyryp jatyrmyz. Farmasevtıkalyq óndiris birden quryla qoımaıtyny belgili. Biraq bul máseleni júıeli túrde sheshýge bolatynyn túsindik. «Alataý» arnaıy ekonomıkalyq aımaǵynda medısınalyq buıymdar shyǵaratyn klaster jasaý týraly sheshim qabyldandy. 2044 jylǵa deıin jeńildik qarastyrylmaq. Infraqurylym daıyn. Qazir 4 joba qarastyrylyp jatyr. 2 joba bastalǵaly tur. Atap aıtqanda, mataǵa jatpaıtyn materıal óndirisi. Bul barlyq jeke qorǵanys quraldary – maska, obaǵa qarsy kostıýmder óndirisi. Eger biz osy óndiristi jolǵa qoısaq, ımportqa táýeldi bolmaımyz. Jobany jyl sońyna deıin aıaqtaý josparlanǵan», dedi S.Tuıaqbaev.
Al Farmasevtıkalyq qyzmetti qoldaý jáne damytý qaýymdastyǵynyń prezıdenti Marına Dýrmanova Densaýlyq saqtaý mınıstrliginiń №104 buıryǵyna sáıkes, dáriniń shekti baǵasy belgilengenin aıtady.
«Bizde dári baǵasyn memleket retteıdi. Sondyqtan árbir ózin qurmetteıtin bıznesmen osy shekti baǵadan asyp ketpeıdi. О́ıtkeni birinshi márte oǵan úlken kólemde aıyppul salynady. Ekinshi ret kásiporynnyń jumysy 6 aıǵa toqtatylýy múmkin. Bıznes jabyldy dep sanaýǵa da bolady», deıdi M.Dýrmanova. Onyń aıtýynsha, dárihanalar tarapynan zańbuzýshylyq tirkelmegen.
«Bizde shekti baǵa bar. Mysaly, parasetamol buryn 70-80 teńge bolǵan. Shekti baǵasy – 128 teńge. Odan qymbat bolýy múmkin emes. Dárihanalardyń bireýi de bul baǵany kótergen emes. Baǵany kóterý týraly áńgime boldy. Biraq baǵa qymbattamady», dedi ol.
Al qala ákiminiń orynbasary qala dárihanalaryndaǵy baǵany arnaıy komıssııa baqylaýda ustap otyrǵanyn aıtty. «Baǵa kóterý boıynsha bir de bir derek kezdespedi. Biz qatań baqylaýǵa almas buryn bireýler 3 parasetamol ornyna 100 qaptama satyp alyp otyrǵan. Sosyn ony ınternet arqyly satyp otyrǵan. Bul derekterdi biz polısııaǵa berdik. 11 derek anyqtaldy», dedi S.Tuıaqbaev.
ALMATY